Gjyqtarja e Apelit Shkodër Hajrie Muçmata u shkarkua nga Komisioni i Pavarur i Kualifikimit të hënën, pas rivlerësimit vetëm në kriterin e Pasurisë. Muçmata vetë nuk ishte e pranishme në sallë gjatë dhënies së vendimit, por u përfaqësua nga avokatja e saj.
Gjatë seancës dëgjimore, trupa gjykuese e kryesuar nga Firdes Shuli, Alma Faskaj relatore dhe Pamela Qirko anëtare, pati vënë në dukje një sërë problemesh në pasuritë e gjyqtares, përfshi burimin të ligjshme të disa huave dhe me deklarata kontradiktore të bëra për procesin e vetingut.
KPK vuri në dukje se nga analiza financiare rezultonte se gjyqtarja kishte mungesë burimesh të ligjshme në disa vite dhe në total 4.7 milion lekë.
Muçmata, e cila kërkoi të rivlerësohej në të tre kriteret pati gjatë seancës dëgjimore një diskutim me vëzhguesin ndërkombëtar, Theo Jacobs i cili i cilësoi të pakuptueshme disa deklarime të gjyqtares që kishte kundërshtuar veten me qëndrimet mbi një marrëdhënie huaje dhe qëllimin e një kredie.
Karriera e Hajrie Muçmatajt në sistemin e drejtësisë ka filluar në vitin 1999, si gjyqtare në Gjykatën e Kukësit. Në vitin 2009, ajo u emërua inspektore pranë Këshillit të Lartë të Drejtësisë ndërsa në vitin 2016, Znj. Muçmata u dekretua anëtare e Gjykatës së Apelit të Shkodrës nga Presidenti i Republikës. /BIRN
