Në dy ngjarje të veçuara, efektivët e policisë së Durrësit janë goditur dhe kundërshtuar nga personat që po shoqëronin në komisariat.
Dy ngjarjet e rënda janë regjistruar gjatë ditës së mërkurë.
Në rastin e parë, ka qenë 22-vjeçari Man Çela, që, duke lëvizur me automjetin e tij në lagjen nr.1 të qytetit, nuk i është bindur urdhrit të policisë për të ndaluar. Pasi ka mundur ta ndalojë të riun, efektivët e policisë, gjatë kontrollit të ushtruar në mjet, nuk kanë gjetur asgjë të dyshimtë, bëjnë të ditur burime policore për DurrësLajm.
Nuk kuptohet qartë pse i riu i është shmangur urdhrit të policisë, për më tepër, që pasi është ndaluar ai ka goditur dhe ofenduar punonjësit e rendit. Mësohet se i riu nuk ka qenë nën efektin as të alkoolit, as të lëndëve narkotike në momentet kur ka bërë të “fortin” duke ngritur dorë mbi uniformat blu. Veprimi i ka kushtuar prangat, pasi është vënë menjëherë në gjendje arresti në flagrancë.
Ndërkohë, personi i dytë që është treguar i dhunshëm me forcat e rendit është 39-vjeçari Kastriot Disha, që konfliktin që ka pasur në familje e ka transferuar edhe në ambientet e policisë, pasi pikërisht gjatë shoqërimit ka kundërshtuar dhe goditur efektivët. Dha ai ka përfunduar pas hekurave.
Ndaj Çelës dhe Dishës, policia e Durrësit ka ngritur akuzën për konsumimin e veprës penale “Kundërshtimi i punonjësit të policisë së rendit publik”.
