Të gjitha automjete me timon anglez që qarkullojnë në Shqipëri, do të bllokohen. Kështu bëri me dije Drejtori i Transportit Rrugor Blendi Gonxhja, i cili theksoi se të gjitha mjetet e targuara pas marsit të vitit 2015 dhe kanë timon anglez, pra sistem drejtimi në krahun e djathtë, do të bllokohen dhe do të futen në listën e zezë.
Gonxhja theksoi se këto automjete nuk do të kalojnë dot kolaudimin, duke paralajmëruar punonjësit që kanë kaluar makina të tilla, do të ndiqen penalisht dhe do të largohen nga puna.
“Çdo targim bërë pas 21 Marsit 2015 dhe je ende në rrugë me timon anglez, je në shkelje flagrante të kodit rrugor. Makina bllokohet, futet në alert, futet në listën e zezë, nuk do kalojë dot kolaudimin. Të gjithë ata që vazhdojnë të abuzojnë në këtë mjet si në momentin e parë të targimit deri sot nëse i ofrojnë shërbim në mënyrë të paligjshme, janë subjekt i kallëzimit për ndjekje penal. Tashmë vetëm në muajt e parë të kolaudimit ne kemi kapur shumë raste. Vetëm javën e shkuar ne kemi njoftuar për largim nga detyra 10 punonjës të DPSHTRR të cilët në vite të ndryshme kanë abuzuar me mjetet të cilat sot janë në rrugë me timon anglez në kundërshtim të hapur me ligjin. Këta njerëz do humbin vendin e punës, do përballen me organet e drejtësisë”, tha ai.
Gonxhja sqaroi se një qytetar që ka në qarkullim një mjet të tillë, do të duhet të ndërrojë krahun e timonit.
“Duhet të ndërrojnë krahun e timonit, duhet të përputhen me kriteret dhe normat, ligjit të kodit rrugor. Të bëjnë ndryshime konstruktive, të aplikojnë për ndryshime konstruktive”, shtoi ai.
Që prej marsit të vitit 2015 në Shqipëri nuk lejohet importi i automjeteve me timon anglez dhe as qarkullimi i tyre në rrugë, për shkak se janë bërë shpesh burim aksidentesh.
