Kryebashkiaku i Kamenicës në Kosovë ka ndërmarrë një nismë për mësimin e shqipes nga serbët dhe anasjelltas, me qëllim për të shtuar kuptimin dhe bashkëpunimin mes komuniteteve. Prej dekadash, Kamenica, njihet për tolerancën e saj.
Pavarësisht mosmarrëveshjeve të vazhdueshme midis serbëve dhe shqiptarëve në Kosovë, një lajm i mirë vjen nga Kamenica, një qytet i vogël në juglindje të vendit, i njohur prej dekadash për tolerancën e tij. Këtu serbët po mësojnë shqip dhe shqiptarët serbisht.
Arsyeja është përmirësimi i jetës së përbashkët dhe kuptimi më i mirë mes komuniteteve.
Ideja për këtë nismë erdhi nga kreu i bashkisë Qëndron Kastrati. 30-vjeçari është më i riu nga kryebashkiakët e Kosovës, bir i një disidenti dhe ish-luftëtari të UÇK-së, i vrarë gjatë konfliktit të viteve 1989-1999 kur Kosova ishte ende një provincë e Serbisë.
Për Kastratin, procesi është vetëm në fillimet e tij dhe do t’i shërbejë heqjes së paragjykimeve.
“Kjo është një nga mënyrat dhe tani është vetëm fillimi, por shumë e rëndësishme për të ardhmen, sidomos për t’i nxitur të rinjtë të afrohen dhe për t’i çliruar nga paragjykimet,” tha Kastrati.
Ai shton se tani është koha të tregohet se ka më shumë gjëra që i bashkojnë komunitetet e Kosovës
Vetë serbët dhe shqiptarët në Kamenicë pranojnë se njohja e të dy gjuhëve është thelbësore për përmirësimin e komunikimit, kuptimit dhe jetës së përditshme.
