Mbajtja pastër e ambjentit është një përgjegjësi e të gjithë qytetarëve dhe subjekteve. Janë disa rregulla pastërtie të cilat duhen zbatuar në çdo moment nëse duam të jetojmë në një ambjent që ja vjen të marrësh frymë.
Agjencia e Parqeve dhe Rekreacionit ka publikuar disa foto ku shihet se si është ndotur “Parku i Madh”, nga hedhja përtokë e çdo letre. Stafi i tyre nis çdo mëngjes pastrimin e mbeturinave që qytetarët lënë pas një ditë më parë. Dhe ky është një fenomen shumë shqetësuës, ndodh çdo ditë dhe duhet ndaluar. APR-ja, në një status në rrjetet sociale shkruan se ka nisur gjobitja e të gjithë qytetarëve dhe subjekteve që nuk respetojnë rregullat e pastërtisë.
“Shikoni si e rinisim ditën herët në mëngjes. Pas shumë këshillimesh e qortimesh do të nisim gjobitjen masive të çdo individi a subjekti që nuk respekton rregullat e pastërtisë në Parkun e Madh! Keqardhje e madhe për antiqytetarinë e treguar nga shumë kundravajtës!”- shkruan Agjencia krahas fotove të publikuara në profilin e tyre zyrtar në Facebook
