Shtabi i Përgjithshëm i Ukrainës thotë se ushtria ruse po sulmon përgjatë një fronti prej 480 km në Ukrainën lindore, si pjesë e ofensivës së saj të madhe në atë që Ukraina e ka quajtur “një fazë e re e luftës”.
Forcat ruse po përqendrojnë përpjekjet e tyre në marrjen e kontrollit të plotë të rajonit të Donbasit, në lindje.
Gjatë kësaj kohe forcat ruse janë përpjekur të thyejnë mbrojtjen e Ukrainës përgjatë pothuajse të gjithë vijës së frontit, tha Shtabi i Përgjithshëm në një deklaratë.
Deri më tani, forcat ruse kanë arritur të kalojnë vetëm nëpër dy zona ,qytetin lindor të Kreminës dhe një qytet tjetër të vogël, thotë administratori ushtarak rajonal i Luhansk, Serhiy Haidai.
Gjithashtu në deklaratë Shtabi i Përgjithshëm tha se ushtria ruse vazhdon të bllokojë dhe bombardojë qytetin port jugor të Mariupolit dhe të lëshojë raketa në qytete të tjera.
