Lëvizja detare në Ngushtica e Hormuzit vijon të mbetet e kufizuar, ndërsa raportohen ndërprerje të trafikut dhe anulime të kalimeve të anijeve, duke shtuar tensionet në një nga korridoret më strategjike të tregtisë globale të energjisë.
Sipas të dhënave të gjurmimit detar, dy cisterna që transportonin gaz të lëngshëm nafte janë detyruar të ndryshojnë kurs dhe të kthehen mbrapsht gjatë lundrimit nga Gjiri Persik. Anijet kishin transponderë aktivë dhe ishin ndër të vetmet që lëviznin në zonë në atë moment.
Mediat ndërkombëtare raportojnë se këto cisterna kanë qenë më herët nën sanksione nga Shtetet e Bashkuara të Amerikës, për shkak të dyshimeve për transport të produkteve energjetike iraniane.
Situata është përshkallëzuar pas njoftimeve për mbyllje të përkohshme të korridorit detar nga autoritetet iraniane, duke rritur ndjeshëm pasigurinë në tregjet ndërkombëtare të naftës dhe gazit.
Presidenti amerikan Donald Trump deklaroi se SHBA po mban një qëndrim të vendosur ndaj Irani, duke theksuar se “bisedimet po përparojnë shumë mirë”, por duke akuzuar Teheranin për përpjekje për presion dhe shantazh.
“Po flasim me ta. Ata donin ta mbyllnin përsëri ngushticën, por nuk mund të na shantazhojnë”, u shpreh Trump.
Nga ana tjetër, Këshilli i Lartë i Sigurisë Kombëtare i Iranit deklaroi se është i vendosur të ushtrojë kontroll mbi ngushticën deri në përfundim të konfliktit, ndërsa IRGC bëri të ditur se zona do të rikthehet “në gjendjen e mëparshme”, nën kontrollin e forcave të armatosura iraniane.
Ndërkohë, SHBA ka njoftuar se ka kthyer 23 anije që nga nisja e bllokadës më 13 prill, veprim që autoritetet iraniane e kanë cilësuar si shkelje të kushteve të armëpushimit.
Zhvillimet e fundit në këtë zonë strategjike pritet të kenë ndikim të drejtpërdrejtë në tregjet globale të energjisë, duke reflektuar menjëherë në çmimet e naftës dhe gazit në mbarë botën.
