NGA MINATORËT TEK…/ Denaj: Ja si do të investohen 14 milionë dollarë në vit

Ministrja e Ekonomisë dhe Financave, Anila Denaj, theksoi sot se “nga projektligji që prezantojmë sot do të përfitojnë 13.300 minatorë, 7.600 naftëtarë dhe 2.500 metalurgë, me një vlerë totale prej 14 milionë dollarë në vit.

Në fjalën e saj në Kuvend, ku po diskutohet “Për trajtimin financiar, suplementar të punonjësve që kanë punuar në miniera, në nëntokë, të punonjësve të industrisë së naftës e të gazit dhe të punonjësve që kanë punuar në metalurgji”, ministrja Denaj tha se “duke marrë parasysh harkun kohor të veprimit prej 10 vjetësh, bëhet fjalë për një vlerë prej 140 milionë dollarë, që buxheti i shtetit do t’i akordojë Institutit të Sigurimeve Shoqërore, si agjencia që mbulon çështjet e pensioneve”.

“Projektligji që prezantojmë sot, fokusohet në trajtimin suplementar, duke vlerësuar punën në vite, në dekada, të punonjësve që kane punuar e punojnë në tre profesionet më të vështira: ate të minatorit nën tokë, të punonjësve të industrisë së naftës e gazit dhe të metalurgjisë. Projektligji ju jep një trajtim suplementar shtesë punonjësve të tre kategorive të përmendura më sipër, plot 23.400 punonjësve, që janë në pension ose që do të dalin në pension në vitet në vijim”, – nënvizoi Denaj.

Sipas saj, me miratimin e këtij projektligji sigurohet pensioni suplementar si një shtesë mbi pensionin e pleqërisë të përfituar nga skema kontributive.

Ndërkohë, vijoi ajo, përfitim tjetër i këtyre kategorive është edhe ulja e moshës për daljen në pension, në 55 vjet për minatorët dhe 60 vjet për naftëtarët dhe metalurgët. “Projektligji është trajtim financiar shtesë, nuk është një status për këto profesione, pasi statuset janë me spektër më të gjerë që lidhen jo vetëm me përfitime financiare në moshë pensioni”-. shtoi Denaj.

Ministrja u shpreh se “projektligji është diskutuar me grupet e interesit, sindikatat përkatëse të minatorëve, industrisë dhe naftës, dhe individë ish minatorë, tani në pension. Projektligji është paraqitur për miratim edhe në Këshillin Kombëtar të Punës në nëntor 2018, si detyrim ligjor i Kodit të Punës. Në mbledhjen e fundit të këtij Këshilli, sindikatat e minatorëve, të industrisë dhe të naftës kërkuan me insistim kalimin e projektligjit me procedurë të shpejtuar”.