Shtetet e Bashkuara të Amerikës dhe Bashkimi Europian kanë ndezur motorët për ngritjen e Strukturës së Posaçme Antikorrupsion. Zyrtarizimi i KLGJ dhe i KLP ishte vetëm hapi i parë i reformës në drejtësi, pasi e gjithë vëmendja do të jetë e përqendruar te organet antikorrupsion. Gazeta ka mësuar se shumë shpejt ambasada e SHBA, ambasada e BE dhe misionet mbështetëse të tyre EURALIUS dhe OPDAT do të ngrenë një grup pune, i cili do të asistojë në ngritjen e SPAK dhe BKH. Burime nga Ministria e Drejtësisë i thanë gazetës se këto dy organe do ngrihen tërësisht me mbështetje të ndërkombëtarëve dhe ata do të mbikëqyrin çdo lëvizje të institucioneve shqiptare.
Po ashtu gazeta ka mësuar se javën tjetër mblidhen KLGJ e KLP dhe të pranishëm do jenë dhe ndërkombëtarët, të cilët do të monitorojnë takimet e anëtarëve. Këshilli Gjyqësor dhe ai i Prokurorisë do të jenë organet që do zyrtarizojnë SPAK. Shumë shpejt ata pritet të hapin garën për rreth 10 prokurorë, të cilët do të godasin korrupsionin në nivele të larta. Ndërkohë SHBA ka gati dhe paketën e ndihmës financiare dhe teknike. Në janar pritet që të jepen mijëra dollarë fonde, ndërsa do të vijojnë dhe ekspertë të caktuar që do të sjellin pajisje speciale.
Shpresat e qeverisë janë se brenda marsit SPAK dhe BKH të nisin nga puna për të luftuar korrupsionin në nivele të larta.
Emrat e parë që rrezikojnë
Me ngritjen e SPAK dhe BKH asnjë pushtetar nuk e ka të sigurt postin. Kushdo që ka bërë afera do marrë atë që meriton. Por në bazë të ligjit, janë disa emra të rëndësishëm që rrezikojnë të kalojnë të parët në skaner. Sipas ligjit për organet e luftës ndaj korrupsionit, me ngritjen e SPAK, si Prokuroria e Krimeve të Rënda, ashtu dhe Gjykata e Krimeve të Rënda do i transferojnë të gjitha dosjet te SPAK. Momentalisht sa i takon personazheve të politikës, në dorë të prokurorisë apo gjykatës janë rreth 11 dosje shumë sensitive.
I vetmi shpëtim për zyrtarët e akuzuar është nëse prokuroria i pushon hetimet, pasi nëse ajo i mban të hapur dhe i çon për gjykim, çdo gjë shkon te SPAK. E para është çështja në ngarkim ndaj ish-kryeprokurorit Adriatik Llalla. Ai po hetohet për 4 vepra penale dhe nëse Krimet e Rënda nuk pushojnë çështjen, dosja do kalojë me patjetër atje. Një tjetër emër është ish-ministri Saimir Tahiri. Edhe ai është në hetim dhe me shumë gjasë dosja do shkojë për gjykim. Pas kësaj gjykata është e detyruar ta transferojë çështjen te SPAK.
Akuzat ndaj Metës e Berishës
Ndër dosjet e para që do të përfundojnë në duart e SPAK janë dhe ato në ngarkim të ish-kryeministrit Sali Berisha dhe ndaj ish-presidentit Ilir Meta. Te Krimet e Rënda ndodhet prej disa kohësh një padi ndaj të dyve, e bërë nga juristi Romeo Kara, sa i takon aferës CEZ-DIA. Madje këtë dosje ai pak ditë më parë ja u dërgoi dhe ndërkombëtarëve. Dosja është ende e hapur. Një tjetër dosje që ka shkuar te Krimet e Rënda është dhe një padi që ka bërë Izet Haxhia ndaj Berishës. Vetëm javën që kaloi ajo shkoi aty.
Të ngelurit e vetingut
Por më të rrezikuarit nga të gjithë janë gjyqtarët dhe prokurorët që kanë ngelur në veting. Janë plot 31 emra që janë shkarkuar nga detyra dhe që të gjithë janë gjetur në shkelje të ligjit, pasi kanë fshehur pasuritë. Ka të tjerë që kanë bërë disa shkelje, nga mashtrimi me formularët, te falsifikimi i tyre. Gazeta ka mësuar se për të gjithë do të ketë hetim penal. Sapo SPAK të ngrihet, pritet që KPK të depozitojë aty provat. Pra sapo SPAK e BKH të ngrihen, janë rreth 42 dosje të rëndësishme që do kalojnë në dorë të tyre./ Kliti TOPALLI
