Ajo ka lindur në vitin 1990 dhe e kanë pagëzuar me emrin Blerta Morina. Por, tani do që të gjithë ta quajnë Blert.
Gjakovari është në proces të tranzicionit gjinor dhe ka kërkuar tashmë ta ndryshojë emrin, por edhe shënuesin e gjinisë në letërnjoftim. Historia u bë publike mbrëmë në Top Channel.
“Mua më është dashur kohë të adaptohem me të gjitha ndryshimet, dhe që të mos i vendos njerëzit në një pozitë të më mësojnë emër tjetër, kam vendosur që vetëm shkronja A të largohet”, ka treguar.
Blerti thotë se kur të jetë plotësisht djalë, do të ndihet përfundimisht vetvetja.
“Po mendoj se ajo do të jetë pika ku do të jem shumë i lumtur, dhe kur do të ndihem vetvetja komplet”, ka thënë ai.
Vetëm atëherë, thotë ai, do të realizohet “mirëseardhja ndaj Blertit në mënyrë absolute”. Tani, sipas Blertit, ai ndodhet në një gjendje “kaotike”.
Blerti e përshkruan veten si “person i hapur, dhe mjaft i afrueshëm për njerëz”.
Ai është në periudhën e tranzicionit për të dryshuar gjini. Blerti u shpreh se është duke marrë hormone dhe ka pësuar shumë ndryshime si në fizik ashtu edhe me zërin, pasi i është trashur. Ndërkohë është në pritje për të bërë edhe operacionin për ndryshimin e organeve gjenitale.
