Kryetari i Grupit Parlamentar të Partisë Socialiste, Taulant Balla në fjalën e tij në mbledhjen e Komisionit të Integrimit Europian, ku u diskutua projektligji për ratifikimin e marrëveshjes mes Shqipërisë dhe Gjermanisë për mbështetjen për negociatat për anëtarësim të Shqipërisë në BE në sektorin ekonomik, deklaroi se marrëveshja rikonfirmon angazhimin e rëndësishëm të Republikës Federale të Gjermanisë në mbështetje të reformave shumë planëshe që Shqipëria ka ndërmarrë.
Fakti që dy të tretat e Bundestagur gjerman u shprehën në favor të fillimit të bisedimeve, për numrin dy të PS Balla, është shprehja më kuptimplotë e gjithçka ka bërë Shqipëria deri më tani si dhe është konfirmim i rrugës pro europiane të Shqipërisë.
“Çështjet e ngritura nga Bundestagu janë detyra shtëpie, për të cilat ne duhet të intensifikojmë punën për plotësimin dhe realizimin e tyre. Qoftë reforma e plotë zgjedhore, qoftë plotësimi i vendeve vakante në Gjykatën Kushtetuese apo Gjykatën e Lartë, përmbyllja e ngritjes së institucioneve të reja të drejtësisë si SPAK dhe BKH janë të gjitha në rrugë të mbarë”, theksoi Balla.
Sipas Ballës, populli shqiptar e meriton tërësisht fillimin e bisedimeve për anëtarësim në BE, pasi është ai i pari që ka bërë gjithçka për ta mbështetur këtë proces.
“Jemi krenar që jemi vendi që kemi më shumë se 94 % të popullsisë që mbështet procesin e anëtarësimit europian”, u shpreh Balla.
Fjala e plotë Taulant Ballës:
Është një marrëveshje e cila rikonfirmon edhe njëherë angazhimin e rëndësishëm të Republikës Federale Gjermane në mbështetje të reformave shumëplanëshe që Shqipëria ka ndërmarë dhe do të ndërmarë. Rishpreh në emër të Grupit Parlamentar të Partisë Socialiste mirënjohjen për qeverinë gjermane.
Në këtë mbledhje të parë të Komisionit të Integrimit Europian pas votimit në Bundestag të autorizimit që Bundestagu i jep Qeverisë Federale për fillimin e bisedimeve për anëtarësim.
Fakti që dy të tretat e Bundestagur gjerman u shprehën në favor të fillimit të bisedimeve, shprehja më kuptimplotë e gjithçka ka bërë Shqipëria deri më tani është konfirmim i rrugës pro europiane të Shqipërisë, është dhe një vlerësim edhe për punën që ne si Kuvend i Shqipërisë kemi bërë në jetësimin e reformave të ndryshme, ku ndër të cilat do të theksoja që reforma në drejtësi është reforma thelbësore dhe guri i themelit mbi të cilin është ngritur qoftë vlerësimi pozitiv nga ana e KE në 29 maj të këtij viti, qoftë dhe vlerësimi nga ana e Bundestagut gjerman në seancën e shkuar të Bundestagut, ku u ritheksua dhe njëherë fakti që Shqipëria ka bërë hapa të rëndësishëm në rrugën europiane.
Dua ta bashkëndaj me ju sot që çështjet e ngritura nga Bundestagu janë detyra shtëpie për të cilat ne duhet të intensifikojmë punën për plotësimin dhe realizimin e tyre. Qoftë reforma e plotë zgjedhore, qoftë plotësimi i vendeve vakante në Gjykatën Kushtetuese apo Gjykatën e Lartë, përmbyllja e ngritjes së institucioneve të reja si SPAK dhe BKH janë të gjitha në rrugë të mbarë.
Dua të them që populli shqiptar e meriton tërësisht fillimin e bisedimeve dhe është ai i pari që ka bërë gjithçka për ta mbështetur këtë proces. Jemi krenar që jemi vendi që kemi më shumë se 94 % të popullsisë që mbështet procesin e anëtarësimit europian. një vlerësim të veçantë meriton dhe qeveria shqiptare për gjithaçka ka bërë në këtë këndvështrim. Padyshim që të gjitha partitë politike duhet të marin përgjegjësitë e tyre në këtë proces. Është një proces ku të gjitha palët kanë detyrime. Kushdo që u mundua të pengonte reformën në drejtësi besoj që e ka marë mesazhin e qartë. Kushdo që u mundua të pengonte zgjedhjet e 30 qershorit e ka marë mesazhin e qartë, kjo edhe nga raporti paraprak i Komisionit të Venecias apo nga raporti përfundimtarë i ODIHR.
Për projektligjin në fjalë doja ti kërkoja qeverisë që të jemi rigorozë në plotësimin e detyrave që burojnë. Qeveria gjermane mbetet donatori kryesor i mbështetjes së reformave në Shqipëri. Kujtoj këtu që janë mbi 1 miliard euro investime gjermane në 27 vitet e fundit, duke e renditur Gjermaninë në vendin e parë sa i përket mbështetjes direkte të ekonomisë dhe popullit shqiptarë.
