Kur kanë kaluar thuajse tre ditë nga tërmeti shkatërrues me magnitudë 6.3, në Durrës aty ku janë edhe zonat më të prekura vijojnë kerkimet për nxjerrjen e trupave që ndodhen poshtë rrënojave.
ALPEnews.al ishte sot në zonën e ish kënetës në Durrës pak minuta pasi toka u lëkund nga tërmeti 5.1 ballë i paradites së sotme.
Siç edhe e kuptoni, pamjet flasin vetë.
Banorët janë jashtë shtëpive të tyre, të shpallura zyrtarisht të pabanuara siç mund të shihet nga shiriti i vendosur para tyre.
Të tjerë janë bërë bashkë teksa presin e pranojnë ndihma në ushqim e veshmbathje. Gjithçka duket e zymtë, përveç banorëve që vijojnë të kenë shpresë se vala e termeteve do të pushojë dhe ata do të mund të kenë sërish një çati mbi kokë, ndonëse jo më shtëpitë e tyre të mëparshme.
E megjithatë, ndonëse në tension ata nuk ngurojnë ti buzeqeshin, përqafojnë e falenderojnë këdo që i afrohet e i pyet per gjendjen apo i ofron ndihma nga me të ndryshmet si të vogla e të mëdha.
Forcat speciale italiane janë të pranishme teksa po në këtë zonë po vijohet një prej operacioneve të kërkim-shpëtimit.
Tre familje të zonë janë bërë bashkë (shih foton mëposhtë) e janë strehuar në një prej ndërtesave ku edhe kanë kaluar natën. Ata presin e marrin ndihma kryesisht në ushqime dhe fjala “faleminderit” nuk nguron të dalë nga shpirti i tyre për asnjë çast.
Padyshim që ankthi është i pranishëm kudo, por duket se të gjithë banorët e ish zonës së Kënetes në Durrës, sot… janë bërë një. /ALPEnews.al
