Shqipëria i përmbushi kushtet për hapjen e negociatave të anëtarësimit me BE-në, deklaroi kryeministri Edi Rama në një intervistë ekskluzive për rrjetin e njohur informativ paneuropian, Euronews.
”Ne jemi gati, duke u mbështetur në vlerësimin dhe rekomandimet e Komisionit , por në të njejtën kohë, vendimarrja e Këshillit nuk bazohet në atë që ne bëjmë dhe në atë që vendet si ne bëjnë, por në situatën e brendshme dhe dinamikën e brendshme dinamikat politike të shteteve anëtare”, deklaroi Rama i pyetur nga Euronews lidhur me vlerësimin e tij për procesin e hapjes së negociatave për anëtarësimin në Bashkimin Europian.
Pyetjes se çfarë do të thotë për Shqipërinë nëse procesi i negociatave nuk fillon njëkohësisht për Maqedoninë e Veriut dhe Shqipërinë, kryeministri Rama i përgjigjet se ”nuk do të ishte strategjike, nuk do të ishte shumë largpamëse”.
”Do të ishte sinqerisht shumë e dëmshme për rajonin. Në të njëjtën kohë do të ishte shumë e padrejtë. Po! Maqedonia e Veriut ka bërë progres shumë të madh me Marrëveshjen e Prespës dhe patjetër ata meritojnë të shpërblehen për këtë, sepse e kanë merituar. Por çështja është: A keni nevojë për një konflikt, për t’u shpërblyer për atë që bënë?”, deklaroi kryeministri.
Ndërkohë, i pyetur se çfarë do i sillte Shqipëria BE-së kur të anëtarësohej, Rama thotë se ”pyetja juaj është shumë e thjeshtë. A ka Europa një plan të qëndrueshëm, do të vazhdojë ta mbajë këtë organ të trupit duke e tërhequr zvarrë apo do ta integrojë brenda saj?”.
”Do të ketë një zonë gri brenda vetes teksa aktorë të tjerë dhe axhenda të tjera mund të fitojnë avantazh duke shfrytëzuar këtë kaos dhe zhgënjim. Mendoj se nëse kthehemi në kuptimin e vërtetë të Europës, siç e dimë edhe sot ky bashkim ishte një projekt për paqe dhe bashkëpunim, ishte një projekt për të parandaluar luftëra dhe kjo është edhe arsyeja pse në Europë sot kemi brezin e parë që është plakur pa parë luftë me sy”, theksoi Rama.
”Rruga drejt BE-së është shumë e gjatë. Dhe dyshoj shumë se do të jem në qeverisje kur të arrijë ajo ditë, pra kur të nënshkruhet marrëveshja”, deklaroi kryeministri Edi Rama në një intervistë ekskluzive për rrjetin e njohur informativ paneuropian, Euronews
