Partia Socialiste do të zhvillojë më datë 29 shkurt 2020, mbledhjen e parë të Kongresit të saj zgjedhor.
Lajmin e ka bere te ditur Sekretari i Përgjithshëm i PS-së, Taulant Balla, i cili ka njoftuar se brenda muajit janar do përmbyllet procesi i brendshëm i zgjedhjes së kryetarëve të Partisë Socialiste.
“Prej disa muajsh jemi në proces riorganizimi ripërtëritjeje dhe përgatitje për zgjedhjet e ardhshme parlamentare te qershorit 2021 dhe pasi kemi zgjedhur kryetarët e organizatave, delegatët e Kongresit, tani Asambletë e zgjeruara zgjedhin edhe kryetarin e Partisë Socialiste për çdo bashki. Ne jemi e vetmja parti që kemi përfshirë në procesin e përzgjedhjes së kryetarëve parimin e barazisë gjinore, duke vendosur të fillojmë të zbatojmë një normë të re të organizimit ku drejtimi i organizatave i besohet një burri, ose djali dhe një gruaje, ose vajze, kemi bërë dhe zgjedhjen me “një anëtar një votë” të të gjithë delegatëve të Kongresit, tani brenda mes janarit do përmbyllim procesin me zgjedhjen e kryetarëve të partisë”- tha Balla.
Sipas tij, ky proces riorganizimi vijon më pas me Kongresin zgjedhor që do të zhvillohet më 29 Shkurt 2020.
