Presidenti amerikan Donald Trump tha se u është përgjigjur “personalisht” pyetjeve të hetuesve rreth dyshimeve mbi ndërhyrjen ruse gjatë fushatës presidenciale të vitit 2016. Por ai shtoi se përgjigjet nuk u janë dorëzuar ekipit të hetuesve.
Dyshimet për bashkëpunim midis ekipit të fushatës së zotit Trump dhe Rusisë po i heton prokurori i posaçëm Robert Mueller. Deri tani Trump-i e ka mohuar me forcë bashkëpunim, ndërsa hetimin e ka quajtur “gjueti shtrigash”.
Presidenti reagoi të enjten në Twitter ku e quajti Mueller-in si një njeri “konfliktual”, ndërsa personat e përfshirë në hetim si “turpi i kombit”.
Mesazhet e tij me tone të ashpra në Twitter vijnë një javë pasi ai e detyroi Prokurorin e Përgjithshëm Jeff Sessions të dorëhiqet, duke e zëvendësuar me Matthew Whitaker, i cili tani ka fuqi për ta shkarkuar prokurorin Mueller apo t’i japë fund hetimit.
Presidenti u tha gazetarëve se hetuesit kanë shpërdoruar miliona dollarë fonde.
Presidenti tha gjithashtu se ata që i shkruan pyetjet “ndoshta kanë qëllime të këqija”