‘’NA ZIEN GJAKU PËR T’IA KALËRUAR NË KËMBË RRUGËVE”/ Rama publikon videon: U desh një virus që të ribiem në dashuri me këtë “dreq” vendi (VIDEO)

Kryeministri Edi Rama ka publikuar një video ku shihet se si ka ndryshuar jeta e shqiptarëve dhe zakonet që tashmë i mungojnë atyre prej kufizimit të lëvizjeve për të luftuar koronavirusit.

‘’Të çuditshëm ne shqiptarët’’, titullohet video e cila vë në pah stereotipet e shqiptarëve, mania për të sharë vendin dhe për ta mbrojtur vetëm kur të tjetër e shajnë. Për të pirë kafe në orarin e punës dhe në kafe të flasin për punë, për të ikur nga vendi dhe pasi ikin mendjen ta kenë vetëm tek vendi apo kur nuk kanë punë t’u mungojë puna dhe kur nuk kanë kafe t’i mungojë kafeja dhe muhabeti.

U desh një dreq virusi thuhet në videon e publikuar nga kryeministri që shqiptarët ta duan Shqipërinë dhe për t’u rikthyer në rrugët e saj.

PËRMBAJTJA E VIDEOS

Jemi njerëz të çuditshëm ne shqiptarët. Kemi një vend të vogël përrallor, por e duam vetëm kur na e shanjë të tjerët, dhe e shajmë më shumë se askush tjetër.

Themi nuk jetohet këtu dhe vetëm ikim, por kur ikim e kemi mendjen vetëm këtu. Në punë pimë kafe, dhe në kafe flasim për punë. Në shtëpi mblidhemi vetëm për të dalë përsëri dhe për t’u ankuar për këtë dreq vendi.

Po tani?

Tani që shtëpia është plot? Mbetëm me kokë në dritare. Tani që vendi është qetësi, pa smog, na zien gjaku për t’ia kalëruar në këmbë rrugët, plazhet, malet, na mungon puna dhe po na plas shpirti për pak kafe dhe muhabet.

Këtij virusi me emrin prej birre më shumë se frikën i kemi inatin pse na ndau me Shqipërinë dhe me shoqërinë. Tani nuk duam të ikim nga Shqipëria, duam vetëm të rikthehemi në rrugët e saj.

Njerëz të çuditshëm ne shqiptarët, gjithnjë kemi atë që s’duam dhe duam gjithnjë atë që e kemi. Dhe megjithëse e kemi kaq të bukur Shqipërinë, u desh një virus që të ribiem në dashuri me këtë dreq vendi…