Kryetari i Partisë Konservatore, Kujtim Gjuzi ka bërë një deklaratë të fortë në Kuvend, teksa tha se në rast se nuk merren parasysh kërkesat e 8 partive të vogla, atëherë edhe ai do “behet gati për sherr”.
Gjatë fjalës së tij, Kujtim Gjuzi i ka kujtuar Taulant Ballës se ka dy ditë që po i anashkalon dhe nuk i pret në takim, ndërkohë që shtoi se ai “na ka dhënë fjalën”.
Deputeti i opozitës se re tha se ai dhe kolegët e tij e sollën Parlamentin brenda parametrave, por ata si grupim janë të gatshëm të bëjnë dhe sherr, madje tha se do gjuaj me bojë kryeministrin, zv.kryeministrin dhe kryetarin e Parlamentit.
Madje shkoi më tej, teksa shtoi se “mund të hidhte granata” brenda Parlamentit.
“Në qoftë se doni sherr në qoftë se doni probleme, mos kujtoni se nuk jemi gati për sherre, por ne duam ta sjellim siç e sollëm parlamentin në parametra.
Ndryshe duhet me fillu me gjujt kryeministrin më bojë, zv.kryeministrin, kryetarin e parlamentit, a ose të hedhim ndonjë granatë këtu brenda.
Sado mundë të duhet këtë nga garda, në qoftë se një deputeti këtu ja jep mëndja për t’u fut me çfarë të duash, futet, se këtu janë futur dhe më parë. Por ne themi se jemi njerëz të përgjegjshëm, de në këtë kuptim ne themi që s’mund t’i anashkaloni 8 partitë politike. Keni dy ditë që anashkalon zoti Balla, ndërkohë që ke dhënë fjalën”, tha Gjuzi.
Por Gramoz Ruçi i ka tërhequr vëmendjen, teksa i tha se nuk ishte në mbledhje të partive politike, por në Kuvend. Ndërkohë që për kërcënimet, Ruci tha se “jashtë kësaj salle bëni çfarë të doni”.
“U kam kaluar dy minuta se kur e përdorni ju, për cilën çështje, është puna juaj, qartë, përsa i përket asaj që ngrite për Sekretarin e Përgjithshëm jemi në Kuvend, jo në mbledhje partish, jashtë kësaj salle bëni çfarë të doni, takime me kë të doni ju”, tha ai.
