Moti i keq dhe stuhia kanë shkaktuar anomali dhe probleme të ndryshme sot në disa qytete të vendit.
Në Vlorë dhe në Durrës, deti deri në 8 ballë e ka bërë të pamundur lundrimin detare, për peshkarexhat, anijet dhe tragetet.
Gjithashtu, në qytetin e Vlorës, stuhia i ka marrë jetën një 68-vjeçari, i cili është goditur nga një vetratë e thyer si pasojë e erërave të forta.
Jo më pak problematike paraqitet situata në rrethin e Shkodrës, ku përmbytjet kanë izoluar 25 familje në dy fshatra.
Situata në Portin e Durrësit
Era e cila fryn me një shpejtësi shpejtësi prej 25 m/s nga jugu në qytetin e Durrësit, ka bërë që forca e dallgëve të shtojë deri në tetë ballë në det të hapur.
Anijet e të gjitha llojeve janë të bllokuara, ndërsa tragetet u ankoruan që herët në mëngjes.
Rteth orës 17.00 pritet një traget që transporton kontejnerë, që mbetet për t’u parë nëse do të arrijë të ankorohet në kalatat e portit.
Parashikohet që moti të nisë të qetësohet rreth orës 22.00.
