Moti i keq që ka prekur prej disa ditësh Italinë duket se po jep efekt dhe në vendin tonë, duke sjellë problem më portet e vendit.
Në Gjirin e Durrësit deti shkon deri në 6, ndërsa në det të hapur deri në 8. Shpejtësia e erës në gji deri në 40km/h, ndërsa në det të hapur deri në 70. Në keto kushte është pezulluar dalja e anijeve të tonazhit të ulët dhe të mesëm, pas njoftimit të Drejtorisë së Portit Detar.
Situata më e keqe paraqitet në portin e Barit, ku ka qenë e paralizuar puna dhe tragetet që do lundoronin mbrëmë drejt brigjeve tona, janë nisur në orën 7 të mëngjesit të sotëm.
Ka një renie të forcës së erës dhe detit krahasuar me orët e natës dhe pritet edhe qetësim i mëtejshëm pasi priten reshje shiu gjatë pasdites që mund të qetësojnë rrymat detare. Era fryn veri-jug. Në Itali deri më tani raportohet të ketë 6 viktima dhe shumë dëme në banesa dhe rrugë.
Kapiteni i Portit të Durrësit, Tauland Allkja bëri të ditur situatën dhe pohoi marjen e masave për shmangien e ndonjë avarie të mundshme detare, deri në qetësim të situatës.
Peshkarexhat, anijet e mallrave janë përkohësisht të akostuara në radën e Portit deri në një urdhër të dytë nga DPD.
Njoftimi i Autoritetit Portual Durrës mbi situatën:
Era e fortë dhe deti i trazuar në të dy anët e Adriatikut kanë penguar lundrimin në orar të trageteve të linjës Durrës – Bari dhe Bari – Durrës.
Nga të dhënat e Qendrës së Informacionit në APD, mësohet se tragetet “Bari” dhe “AF Francesca”, të cilët duhet të niseshin nga porti i Barit natën e kaluar kanë nisur lundrimin drejt Durrësit vetëm sot rreth orës 7.00. Këto tragete pritet të mbërrijnë në portin e Durrësit pas 7-8 orësh.
Vonesa ka patur edhe në nisjen nga Durrësi drejt Barit për tragetin “Rigel”, i cili është larguar nga porti rreth orës 5.30.
Vetëm trageti “AF Marina” është nisur po ashtu nga Durrësi natën e kaluar, por me vonesa shumë të vogla.
Kushtet detare aktualisht janë më të mira se sa natën e kaluar, por lundrimi në det mbetet i vështirë-thanë burimet e APD.
