Ministrat e Jashtëm të Bashkimit Evropian janë solidarizuar me Francën, për shkak të vendimit të Australisë që të heqë dorë nga marrëveshja për blerjen e nëndetëseve elektrike franceze dhe nënshkrimit të një marrëveshje të re me Shtetet e Bashkuara dhe Britaninë për nëndetëse me kapacitet bërthamor.
Ky njoftim “ka qenë në kundërshtim me thirrjet për bashkëpunim më të madh me Bashkimin Evropian në Indo-Paqësor”, ka thënë shefi për Politikë të Jashtme i Bashkimit Evropian, Josep Borrell më 20 shtator, pasi është takuar me ministra të BE-së, para takimeve në Asamblenë e Përgjithshme të Kombeve të Bashkuara në Nju Jork.
Ministri i Jashtëm francez, Jean-Yves Le Drian ka thënë se ka anuluar një takim në Nju Jork me homologun e tij australian, për shkak të “krizës së besimit” pas anulimit të marrëveshjes me vendin e tij dhe po ashtu ka deklaruar se nuk planifikon asnjë takim me homologun e tij amerikan, Antony Blinken.
“Ne jemi aleatë, ne bisedojmë dhe nuk fshehim strategji të ndryshme. Për këtë ka krizë të besimit”, ka thënë ai.
Javën e kaluar, Parisi mori vendimin për thirrur për konsultime ambasadorët që ka në Australi dhe Shtetet e Bashkuara, një vendim bi paprecendent midis aleatëve.
SHBA, Britania dhe Australia kanë thënë se marrëveshja e re forcon përkushtimin e tyre për rajonin e Indo-Paqësorit dhe kanë insistuar se kriza diplomatike nuk do të ndikojë në marrëdhëniet afatgjata me Francën, edhe pse kjo ka shkaktuar jo pak ndarje.
