Ofensiva ukrainase vazhdon prej dy ditësh në rajonin Kursk të Rusisë. Kievi e quan sulmin si pasojë e “agresionit” rus prej shkurtit 2022 ndaj Ukrainës, tha këshilltari presidencial ukrainas Mykhailo Podolyak. Që nga e marta, autoritetet ukrainase kanë zgjedhur të heshtin për situatën dhe nuk kanë bërë asnjë koment zyrtar për atë që po ndodh brenda territorit rus.
“Rusia ka besuar gjithmonë se nuk zbatohen norma ligjore kufizuese ndaj saj dhe se mund të sulmojë territoret e vendeve fqinje pa u ndëshkuar dhe në mënyrë hipokrite të pretendojë paprekshmërinë e territorit të saj”, tha Podolyak. “Por lufta është luftë, me rregullat e saj, agresori i paguan pashmangshëm pasojat”, përfundoi ai.“Që nga dita e parë e pushtimit të Ukrainës nga Rusia, Kievi ka kombinuar përpjekjet politike, diplomatike dhe ushtarake për të marrë F-16: tani avionët e parë luftarakë janë në qiellin e Ukrainës dhe do të mbërrijnë më shumë”, ka shkruar Presidenti ukrainas Volodymyr Zelensky në rrjetin social X.
Që në ditën e parë të pushtimit rus në shkallë të gjerë, Ukraina u kërkoi partnerëve të saj të mbyllnin qiejt ose të siguronin avionë.
Pas sulmit në rajonin Kursk, Kievi i ka bërë thirrje banorëve rusë të evakuohen.
Mësohet se në terren ushtria ruse po vepron duke bombarduar pa dallim, përfshirë edhe sulmet me raketa. Gjithashtu, mediat raportojnë se mjaft struktura civile në Kurskll janë sulmuar nga ushtria e Ukrainës.
Nga ana tjetër, Moska pretendon se ka arritur të ndalojë përparimin ukrainas në rajonin perëndimor të Rusisë.
