Presidenti i Shqipërisë, Ilir Meta, dekretoi të mërkurën në mbrëmje 4 zonja si ministre të qeverisë Rama, duke lënë sërish jashtë ministrinë e jashtme. Ministre e infrastrukturës dhe energjisë është Belinda Balluku, ministre e financave dhe ekonomisë është Anila Denaj, ministre e arsimit, sportit dhe rinisë është Besa Shahini dhe ministre e kulturës është Elva Margariti.
Mosdekretimi i shefi të ri të diplomacisë shqiptare Gent Caka, e rikthen institucionin e Presidencës, në skenarin e 2018, kur nuk u firmos fillimisht dekreti për emërimin e ministrit të Brendshëm, Sandër Lleshi.
Po ku dallojnë dhe ku takohen këto dy skenarë?
Dallohen së pari, nga fakti se ndryshe nga herën e parë Presidenti i Republikës nuk e ka firmosur dekretin për shkarkimin e ministrit të Jashtën Ditmir Bushati. Ky hap konsiderohet i paprecedentë si nga pikëpamja kushtetuese, ashtu edhe nga praktikat e mëparshme në marrëdhënit Presidencë- Kryeministri.
Së dyti, dallon nga fakti se në rastin e z. Lleshi, kishim të bënim vetëm me një propozim të Kryeministrit, pas dorëheqjes së ministrit të Brendshëm, Fatmir Xhafa. Ndërsa tani kemi të bëjmë me një numër ndryshimesh në qeveri, të propozuara nga vetë shefi i qeverisë dhe jo nga një hap i detyruar.
Së treti, me ministrin e Jashtëm që nuk është shkarkuar ende sipas propozimit të Ramës, Ilir Meta ka patur përplasje të mëparshme publike, për shkak të detyrave respektive, kryesisht në funksion të negociatave për zgjidhjen e mosmarrëveshjeve historike me Greqinë. Ndërsa me ministrin e Brendshëm, Meta nuk kishte shfaqur shenja pubike. Çka mosfirmosja e dy dekreteve, konsiderohet në mënyrë reciproke, sa si një hakmarrje e Metës ndaj Bushatit, sa edhe ndaj ministrit të ri Caka, si një prurje politike që nuk është në harmoni me humorin momental të kreut të shtetit.
Ndërkohë që dy skenarët e Metës takojnë:
E para, sepse si në rastin e Sandër Lleshit ashtu edhe në këtë të Gent Cakës, po thellohet precedenti i mosdekretimit të ministrave të rinj, pa shkaqe kushtetuese të deklaruara publikisht.
E dyta, në të dyja rastet po tejkalohet afati 7 ditor i përcaktuar nga Kushtetueta për Presidentin.
E treta, po e çon rastin Caka tek kazusi Lleshi, që presupozon dërgimin për herë të dytë të kërkesës për dekretimin e të njëjtit emër për ministër.
Katër dekretet e tjera të sapofirmosura, sipas VOA, plotësojnë në tërësi kabinetin qeveritar, i cili ka mbetur pa titullar në një sektor me rëndësi të veçantë si diplomacia.
Presidenti Meta sërish nuk dekretoi ministrin e ri të jashtëm, të propozuar nga kryeministri Rama, Gent Cakaj, ashtu si katër ditë më parë kur firmosi 4 dekrete për ministra të rinj.
Zoti Meta tha për shtypin nga Kavaja se “për të gjithë emrat e rinj, apo figurat e reja që promovohen për ministra, pra që propozohen si të tillë, po bëhet detyra normale, me shumë përgjegjësi për verifikimin e integritetit të tyre, në mënyrë që të respektojmë institucionin e ministrit, si një institucion shumë të rëndësishëm kushtetues”.
Ai i bëri këto komente pas pyetjeve për mosdekretimin e Genti Cakajt dhe për mosshkarkimin e ministrit të Jashtëm, Ditmir Bushati. Presidenti Meta siguroi se do të respektohen afatet kushtetuese, dhe se përgjigja e tij do të varet nga përgjigja e institucioneve që iu është drejtuar Presidenca.
Presidenti nënshkroi në fundjavë shkarkimet për ministrat e larguar nga kryeministri Rama, përveç ministrit të jashtëm Ditmir Bushati.
Nga 9 propozimet e kryeministrit, ai dekretoi vetëm 4 prej tyre; zëvendëskryeministrin Erion Braçe, ministrin e bujqësisë Bledi Çuçi, ministrin për mbrojtjen e sipërmarrjes Eduard Shalësi dhe ministren për marrëdhëniet me parlamentin Elisa Spiropali.
Përgatiti: Alpenews.al