Në këtë foto prekëse, shihet Oleksandra Zhovtyuk, një nënë e tre fëmijëve duke puthur të birin e saj të vogël. Ajo ka shkuar për t’u strehuar në shtëpinë e gjyshes së saj në qytetin e pushtuar nga Rusia të Khersonit, në jug të Ukrainës.
Duke folur për CNN, nëna e tre fëmijëve thotë se nuk i kanë mbetur shumë ushqime apo medikamente mjekësore.
Ajo tregon se kurrë nuk e kishte menduar se do t’i mësonte fëmijët e saj të vegjël se si të fshiheshin nga bombat.
“Ne po ndihemi të izoluar nga pjesa tjetër e Ukrainës tani,” tha Oleksandra Zhovtyuk.
Fëmija më i madh i Zhovtyuk është një vajzë 7 vjeçare që tashmë e kupton se çfarë po ndodh.
“Ajo zgjohet natën, qan dhe më pyet se kur do të përfundojë”.
“Fëmija im i dytë nuk kupton dhe mendon se është si një lojë. Në fakt, unë me të vërtetë dua që ajo të mendojë se është si një lojë – që ne duhet të luajmë sipas rregullave.”
Zhovtyuk shqetësohet se çfarë po i bën lufta fëmijës së saj 18-muajsh.
“Me gjithë këtë atmosferë, ai duket shumë keq gjatë natës, qan dhe dëshiron të jetë me mua gjatë gjithë kohës, sepse e ndjen se diçka po ndodh”, tha ajo.
Zhovtyuk tregon për CNN se i ka thënë vajzë së saj të madhe se “ne duhet të jemi të fortë tani, duhet të jemi bashkë dhe duhet të më dëgjojë mua”.
Fëmijët flenë në korridor pasi është pjesa më e sigurt e shtëpisë kur fillojnë bombardimet.
“I thashë, nëse diçka do të shpërthejë, ajo duhet të mbajë motrën e saj dhe të mos vrapojë tek unë. Ata duhet të qëndrojnë atje dhe të jenë aty për të. Gjëja e frikshme është se ajo është 7 vjeç, dhe unë nuk e kisha menduar kurrë se do t’i thoja fëmijës tim të mos vrapojë tek unë, por të rrijë me motrën e saj. Nuk di çfarë të them. Është shumë e frikshme”, tha Zhovtyuk.