Është zhvilluar sot seanca e parë gjyqësore ndaj bandës së Habilajve.
14 të arrestuarit kanë dalë përpara drejtësisë italiane dhe kanë kërkuar gjykim të shkurtuar, me përjashtim të italianit Vincenzo Spampinato.
Gazeta italiane “MeridioNews” zbulon disa detaje nga seanca e sotme.
“Në sallën e gjyqit hynë të gjithë të arrestuarit.I hequr në fytyrë, me një bluzë polo të modës, u ul edhe ai, Moisi Habilaj. Salla ishte e mbushur plot, kryesisht të afërm të të arrestuarve. Shumë prej tyre kishin mbërritur posaçërisht nga Shqipëria.
Moisi Habilaj, i konsideruar si koka e rrjetit të trafikut të drogës në Itali, nisi të puthte me dorë të afërmit që ndodheshin në sallë. Ai u shfaq i qetë dhe herë-herë i qeshur”, shkruan media italiane.
E ndërsa Florian Habilaj është ende në arrati, Nazer Seiti nuk do të jetë pjesë e këtij procesi, raporton Newsbomb. Seiti konsiderohet si financieri i gurpit. Ai u arrestua në Shqipëri dhe u ekstradua më pas mes polemikash në itali. Fillimisht u fol se Seiti pranoi të kthehej në të penduar, por zërat u mohuan nga avokati i tij.
