Analisti Besnik Mustafaj pohoi se protesta e 27 janarit e organizuar nga opozita i kishte kaluar pritshmëritë e tij. I ftuar në rubrikën ‘Opinion’ në “News24” Mustafaj tha se në tubimin e së shtunës kishte pjesëmarrje masive të qytetarëve nga i gjithë vendi. Por përpos kësaj, ai theksoi se kryedemokrati Lulzim Basha dhe liderët e tjerë opozitarë duhet të dinë të vlerësojnë mesazhin e kësaj proteste, pasi kjo sipas tij nuk do të thotë se qytetarët e pranishëm në tubim do t’i mbështesin. “Prania e shumë dhjetra mijëra shqiptarëve në atë miting tregoi një reagim të përgjithshëm të pakënaqësisë ndaj Ramës. Por unë kam frikë se nga Basha dhe lidershipi i opozitës nuk do të mundet ta lexojnë drejt. Prania e aq njerëzve s’do të thotë detyrimisht mbështetje për ta. Unë jam njeri që kam kaluar shumë kohë nëpër protesta. Unë e di si është një njeri i ardhur ne shesh se protesta e tij do të realizoj një kërkesë të tij. Kjo shpresë mund të ringjallet përmes një programi të vërtetë politik. Shpresoj që Basha dhe krerët e opozitës ta kuptojnë. Unë qëndrova tek dy kullat. Takova shumë protestues. Siç ju thash të gjithëve na ka ardhur shpirti në majë të hundës kjo qeveri. Shpresa dhe ajo që mungonte në protestë nuk ndërtohet në një ditë. Le të shpresojmë që do të jetë një vazhdim serioz”, tha Mustafaj.