Krishti u ringjall. Mos kini frikë! U ringjall siç kishte thënë.” Ky ishte mesazhi që përshkoi meshën solemne të mesnatës në Katedralja “Shën Pali”, ku qindra besimtarë katolikë u mblodhën për të kremtuar festën më të rëndësishme të besimit të tyre.
Mesha u drejtua nga Arqipeshkvi Metropolit i Tiranë-Durrësit, Imzot Arjan Dodaj, i cili në fjalën e tij theksoi rëndësinë shpirtërore të kësaj nate të shenjtë.
“Kjo vigjilje që po përjetojmë së bashku është përvoja që njerëzimi priste që nga largimi prej kopshtit të Edenit. Në këtë kremtim janë me ne edhe të dashurit tanë që na paraprinë në jetën e pasosur, sepse Pashka vlen për të gjithë”, u shpreh ai.
Arqipeshkvi përcolli edhe një mesazh urimi për besimtarët, duke theksuar nevojën për rilindje shpirtërore në familje dhe shoqëri: “Pashkë të shenjtë që të jetë rilindje në shpirt në familjet tona, në çdo të ri e të re shqiptare. Me Zotin çdo shpresë e vdekur ringjallet dhe merr jetë me më shumë dritë e entuziazëm për të sotmen dhe të ardhmen”.
Në vijim, ai kujtoi se përfundimi i vigjiljes shënon fillimin e një dite të re, një simbolikë e ringjalljes dhe e shpresës. Gjithashtu, ai iu referua lutjeve të heshtura të besimtarëve dhe riteve të Udha e Kryqit, duke nënvizuar rëndësinë e reflektimit dhe sakrificës.
Në përfundim të meshës, ai pagëzoi disa besimtarë, një rit që simbolizon fillimin e një jete të re në besim.
