Gazetari dhe analisti shqiptar, Mero Baze, ka komentuar rreth kërcënimeve të presidentit turk, Recep Tayyip, për Kosovën, pas reagimeve në vend ndaj dëbimit të gjashtë shtetasve turq nga Kosova në Turqi, ku ata akuzohen për gjoja terrorizëm.
Baze ka thënë në emisionin “Pressing”, me Leonard Kerqukin, në televizionin T7, se orientimi perëndimor i Kosovës është përgjigja më e mirë që vendi mund t’i japë Erdoganit.
Sipas Bazes, Erdogan bëri “grusht shteti brenda shtetit të Kosovës”.
“Ka keqpërdorur institucionet më të larta të sigurisë, si dhe presidentin”, ka thënë Baze, duke e quajtur këtë një “gjest poshtërues, të papërgjegjshëm”, nga ana e presidentit turk.
“Ky është një stil politik i Erdoganit, i të sunduarit të tij. I konsideron partnerët si ushtarë, si të dërguar të sulltanit në rajon”, ka vlerësuar Baze.
Ai ka thënë se ajo që ka ndodhur në Kosovë me dëbimin e gjashtë shtetasve turk rrezikon të përsëritet – jo vetëm në Kosovë, por kudo ku Erdogan i konsideron udhëheqësit miq personalë.
“Rreziku ekziston edhe në Shqipëri”, ka vlerësuar Baze. Ai ka thënë se Erdogan ka një raport shumë personal, shumë miqësor me kryeministrin shqiptar, Edi Rama.
