“MË THA DO TË QËROJMË…”/ Deputeti serb: Si më dhunuan afër parlamentit të Kosovës (VIDEO)

Deputeti i Kuvendit të Kosovës, Sllobodan Petroviç ka thënë se është sulmuar sot në afërsi të ndërtesës së Kuvendit të Kosovës.

“Në mëngjes isha mysafir në RTK, aty kam bërë disa deklarata rreth punës së ish-ministrit Rikallo, pra këtë e them se personi që me sulmoi ishte këshilltari i Rikallos, Millan Kostic. Ai fillimisht me ka sulmuar me fjalë të pahijshme. Unë u afrova dhe e pyeta se çfarë ishte puna, e mori shishen në dorë, dhe më tha që do të godas dhe do ta thyej kokën. Personi tjetër që ishte në tavolinë me të u afrua dhe më tha që do t’i qërojmë hesapet, dhe në atë rrëmujë më ra telefoni në dorë, dhe e mora telefonin, në dorë”, ka thënë Petroviç.

Ai ka shtuar se personi i cili e sulmoi është Milan Kostiç, këshilltar i ish-ministrit të Bujqësisë, Nenad Rikallo.

Në një reagim të Listës Serbe pretendohet se është pikërisht Milano Kostiç ai që është sulmuar nga ana e Sllobodan Petroviçit.

Kështu, siç thuhet ndër tjerash, Lista Serbe ka kërkuar që “policia dhe prokurorët të marrin të gjitha veprimet e nevojshme që Sllobodan Petroviç dhe Boban Stankoviç të ndiqen dhe të dënohen, sepse kjo sjellje është absolutisht e papranueshme”.

Lista Serbe ka publikuar edhe pamjet e sulmit.