Zbardhet dëshmia e efektivit të Policisë, Lisjan Myrtaj, i cili qëlloi dje me armë djalin e kryeplakut të Kaninës në Vlorë. Ngjarja ndodhi në lagjen “10 Korriku”. Mësohet se Lisjan Myrtaj ka qëlluar në drejtim të Juxhin Todi (Aliaj), i cili shoqërohej nga e dashura e tij, ndërkohë fatmirësisht nuk ka mbetur i lënduar. Fill pas krimit, polici u largua nga vendngjarja, për t’u dorëzuar pak më vonë përpara kolegëve të tij. Gazetari Enrik Mehmeti ka siguruar për BalkanWeb dëshminë e policit, i cili ka dhënë një version tjetër nga çfarë është folur deri tani. Ai është shprehur se ka patur më parë një debat me Juxhin Todi (Aliaj).
Efektivi i Policisë është shprehur se është ndjekur me makinë nga Juxhini dhe sapo ka ndalur pranë banesës së te tij, i ka drejtuar armën duke e ofenduar dhe e ka shkrepur dy herë. Sipas tij kjo ka bërë që ai të reagojë për vetëmbrojtje duke goditur në drejtim të makinës. Ai ka telefonuar sallën operative dhe ka pritur që të mbërrinin kolegët e tij duke mos lëvizur nga vendngjarja.
Myrtaj i ka deklaruar kolegëve se ka goditur për vetëmbrojtje dhe se është ndjekur deri jashtë derës së shtëpisë së tij. Sipas policit, Aliaj i cili udhëtonte me fuoristradën ‘ML’ ishte arratisur menjëherë ndërsa sipas efektivit të Deltës kur i ka shkuar Juxhinit në shtëpi ai ka qenë i vetëm. Motiv i debatit sipas burimeve ka qenë akuza e Juxhinit se efektivi i policisë i kishte parë të dashurën më parë.
