Me maska e doreza, me nga një metër distancë secili, deputetët kanë marrë sot pjesë në seancën e jashtëzakonshme plenare.
Amendamenti i propozuar nga deputetja e Partisë Socialiste Edlira Bode, për ndryshimin e Kodit Penal, duke parashikuar deri në 15 vjet burg për personat që thyejnë karantinën dhe infektojnë të tjerët me pasojë vdekjen, është bërë mollë sherri në Kuvend.
Ndryshimet janë propozuar që më datë 10 janar 2020 nga deputetet e Partisë Socialiste, Klotilda Bushka dhe Eglantina Gjermeni dhe parashikonin ashpërsimin e dënimit për dhunën në familje, veçanërisht për burrat që rrahin gratë në sy të fëmijëve.
Mirëpo, në kushtet kur sot po mbahet seanca e jashtëzakonshme, deputetja Bode propozoi një amendament për projektligjin në fjalë me qëllim për t’u kaluar në votim.
Deputeti i opozitës së re Ralf Gjoni ndërkaq e kundërshtoi ashpër këtë fakt duke e cilësuar si ‘tinzare’ mënyrën se si po tentohet të kalohet ky amendament ndërsa kolegen e tij Bode e quajti ‘të përdorur’ në këtë rast, edhe pse siç tha ai, “Bode është një nga zonjat më fjalëpak të Kuvendit”. Nga vendi, me maska e doreza, u irrituan së tepermi nga fjalët e Gjonit, deputetet Mimi Kodheli dhe Evis Kushi. Kjo e fundit madje, i ra edhe me grushta tavolinës.
Pas kësaj reagoi kreu i Kuvendit Ruçi i cili i tha Gjonit se ndjen neveri për mënyrën se si u shpreh për Boden.
“Me neveri mund të them se gabuat rënde kur ju drejtuat nismëtares që vlen të respektohet dhe s’ka vend të anatemohet ndaj kërkoj ta tërhqini atë që thatë”, tha Ruçi.
