Dy vjet janë bërë të shtunën nga vrasja tronditëse e Liridona Ademajt, një ngjarje që shkaktoi reagim të madh në opinionin publik. Ajo u ekzekutua më 29 nëntor 2023, ndërsa udhëtonte me makinën ku ndodheshin bashkëshorti i saj, Naim Murseli, dhe dy djemtë e tyre. Murseli akuzohet se ka porositur vrasjen e bashkëshortes.
Për këtë krim aktualisht po gjykohen Naim Murseli, Granit Plava dhe Kushtrim Kokalla. Dëshmia e Granit Plavës, e përfshirë në dosjen hetimore, hedh dritë mbi rolin e Murselit në përgatitjen e armës dhe zhvillimet para ekzekutimit.
Plava deklaron se takimet e tij me Naim Murselin kishin nisur dy ditë para vrasjes, ndërsa mëngjesin e 29 nëntorit ata ishin nisur bashkë drejt Prishtinës, me automjete të ndara. Sipas dëshmisë, Murseli ia kishte dorëzuar vetë armën dhe municionin, duke e udhëzuar hap pas hapi për planin e ndjekjes së çiftit.
Ai rrëfen se ishte udhëzuar të ndiqte makinën ku gjendeshin Naimi, Liridona dhe fëmijët e tyre, sipas planit të paracaktuar. Plava thotë se i ishin dhënë një armë me 5 fishekë në shanzher dhe 15 të tjerë rezervë.
Në dëshminë e tij, të publikuar nga mediat në Kosovë, Plava tregon:
“Dy ditë më herët, përmes Kushtrimit, jam takuar me Naimin; kemi dalë natën dhe kemi pirë. Ditën kritike jam zgjuar në mëngjes, dhe rreth orës 9:30–10:00 Naimi erdhi më mori dhe u nisëm për në Prishtinë. Ai shkonte përpara, unë pas. Tek një pompë karburanti ma la armën, 5 fishekë në shanzher dhe 15 të tjerë. Pastaj u nisëm së bashku drejt Prishtinës. Më dha një kafe dhe më erdhi energjia.”
Plava tregon se e kishte ndjekur makinën e çiftit deri te banesa e tyre dhe kishte parë vendin ku do të kryhej vrasja. Ai përshkruan lëvizjet e tij për të shmangur policinë, pasi kishte konsumuar marihuanë, dhe takimin e radhës me Naimin në Graçanicë, ku priste udhëzimet e tij.
Më tej ai rrëfen momentin e vrasjes:
“Kur dolën nga kafja në Graçanicë, isha pas tyre. Shkuam te vendi afër shtëpisë së Naimit. Kur ai u ndal, dola përpara. Ata hapën pak xhamin dhe unë shtie në drejtim të saj. Naimi thoshte ‘gjuj, gjuj’. Pastaj ika me makinë dhe shkova në shtëpi. Rreth një orë më vonë u ktheva dhe rashë të flija. Të nesërmen mora vesh se ajo kishte vdekur. Dy ditë më pas erdhi policia dhe më arrestoi.”
Dëshmia e tij po shqyrtohet nga trupi gjykues së bashku me provat e tjera të çështjes, ndërsa procesi vijon.
