Teodor Lera një ditë më parë vrau bashkëshorten e tij Eva Lera në qytetin e Vlorës. Çifti prej disa ditësh kishin konflikte me njëri-tjetrin dhe për ti pajtuar vajza që jetonte në Tiranë shkoi në Vlorë, por I gjeti prindërit të mbuluar nga gjaku.
Teodor Lera, pas një konflikti verbal me 45-vjeçaren, ka marrë një thikë nga kuzhina duke e qëlluar vetëm një herë. Më pas nga të bërtitura dhe tentativa e Eva Lerës për t’u larguar, e ka kapur atë për fyti duke e mbytur. Në kushtet e një tronditjeje të thellë psikologjike, 57- vjeçari me thikën ka tentuar të vrasë veten, duke prerë damarët e gjymtyrëve.
Ai u dërgua në Spitalin Rajonal të Vlorës, ku mjekët bëjnë të ditur se ndodhet jashtë rrezikut për jetën. Policia, e cila ndodhet vetëm 50 metra larg banesës, është njoftuar nga vajza e vogël e çiftit, e cila në ato momente sapo ishte kthyer nga Tirana, ku studion. Veç saj, çifti Lera ka dhe dy fëmijë të tjerë, të cilët jetojnë jashtë vendit, vajza e madhe në SHBA dhe djali në Angli.
Mësohet se vajza e vogël ka përjetuar tronditje të thellë, pasi ka përjetuar nga afër konfliktin e prindërve që përfundoi me vrasjen e nënës së saj. E vënë në dijeni për acarimin e marrëdhënies së tyre, ajo kishte vendosur që të udhëtonte nga Tirana për në qytetin bregdetar për të qetësuar gjakrat mes tyre.
Por, pa mbërritur ende në banesë, ajo ka parë skenën tek pallati, nëna e saj ishte e shtrirë pa jetë, ndërsa babai ishte i mbuluar në gjak.
