Mëngjesi i kësaj të premteje i gjeti rrugët e qytetit të Kozanit bosh. Është zona e parë në Greqi që iu nënshkrua bllokimit total në këtë fazë të dytë të pandemisë, pas rritjes së frikshme të rasteve të infeksionit me Covid-19.
Masat shtesë shtrënguese u miratuan dje nga qeveria dhe sot ishte dita e parë e aplikimit.
Në qendër të Kozanit kishte trafik të kufizuar nga qytetarët, ndërsa trafiku në rrugët e qytetit u zvogëlua ndjeshëm.
Qyteti është klasifikuar si “zonë e kuqe”, niveli i katërt i alarmit.
Dyqane dhe shërbime të shumta kanë pezulluar funksionimin e tyre, ndërsa restorantet u hapen por do të shërbejnë vetëm me dërgesa.
Shumica e qytetarëve që lëvizin në Kozani mbajnë maska, ndërsa prindërit janë të shqetësuar për mbylljen e shkollave për fëmijët.
Ankthi i bizneseve të Kozanit është i dukshëm, ndërsa Dhoma e Tregtisë ka shprehur indinjatën e saj me anë të një letre duke kërkuar masa të menjëhershme mbështetëse për të gjithë profesionistët.
Ndërkohë qeveria ka paralajmëruar mbështetje, bonus emergjent dhe ulje qiraje.
Karantina do të zgjasë deri më 29 tetor.
Aktualisht Kozani ka 227 raste aktive, dmth 227 pacientë me infeksion Covid-19 dhe 554 kontakte në kufizim.
Masat në fuqi
Për 14 ditët e ardhshme në Kozan ndalohet lëvizja jashtë, maskat janë të detyrueshme brenda dhe jashtë, tubimet dhe konferencat janë të ndaluara, dyqanet me pakicë dhe restorantet do të jenë të mbyllura (lejohen vetëm shërbimet e paketimit dhe shpërndarjes).
Do të jenë të mbyllura gjithashtu klubet e natës, gjykatat, vendet arkeologjike, muzetë, teatrot, kinematë, parukieritë, etj.
