Gjykata e Tiranës i dha dritën jeshile ekstradimit në Gjermani të një 33-vjeçari të shumëkërkuar si trafikant droge, i arrestuar në Rinas në mars të këtij viti, teksa maskohej si refugjat ukrainas.
Samet Durmus, alias Rizvan Farkandinov, do të vihet në dispozicion të drejtësisë gjermane, e cila ka lëshuar dy urdhra-arresti ndërkombëtar ndaj tij. Referuar akteve të përcjella nga pala gjermane, rezulton se Durmus ose Farkandinov ka qenë pjesëmarrës në një organizatë kriminale, që kishte për qëllim trafikimin e lëndëve narkotike në Gjermani në vitin 2002.
Ai dyshohet të jetë përfshirë në 36 episode kriminale. Masat e sigurisë “arrest në burg” janë caktuar ndaj tij nga Gjykata e Shtutgartit, i pari në vitin 2021 dhe i dyti në maj 2022, pas prangosjes së tij në Shqipëri.
Për të dy urdhrat, pala shqiptare ka lejuar ekstradimin e tij. Në seancën e fundit gjyqësore, Durmus ka shprehur pëlqim për ekstradimin, duke kërkuar të ishte sa më shpejt pranë familjes së tij në Gjermani.
33-vjeçari i lindur në Krime u arrestua teksa po kalonte tranzit në Rinas drejt Gjermanisë. Ndonëse paraqiti para autoriteteve dokumente me identitetin fals ukrainas Rizvan Farkandiov, ai u tradhtua nga gjurmët e gishtave, që rezultuan të njëjta me ato të Durmus, i kërkuar ndërkombëtarisht.
