Investitorja e një objekti në Berat është arrestuar, ndërsa administrator dhe drejtuesja teknike e firmës së ndërtimit që po kryente rikonstruksionin janë shpallur në kërkim pas vdekjes tragjike të një punëtori 47-vjeçar. G. S., i cili po punonte në rikonstruksionin e një objekti në lagjen “13 Shtatori”, humbi jetën kur një masiv guri u shkëput nga zona e kalasë dhe e zuri poshtë.
Policia e Beratit ka arrestuar në flagrancë investitoren, V. S., 45 vjeçe, ndërsa ka shpallur në kërkim administratorin Ç. H., 53 vjeç dhe drejtuesen teknike I. Ç., 41 vjeçe. Hetimet kanë zbuluar se G. S. ishte i paregjistruar në organet tatimore dhe ka humbur jetën për shkak të shkeljes së rregullave të mbrojtjes në punë. Shtetasit në kërkim po akuzohen gjithashtu për tentativë për të penguar hetimet duke fshehur informacionin e rëndësishëm. Puna për kapjen e dy të dyshuarve vazhdon.
