Dy shtetas të shpallur në kërkim ndërkombëtar janë ekstraduar nga Londra dhe Belgjika në drejtim të Tiranës.
Policia e Shtetit sqaron se Kreshnik Kule, 35 vjeç, u ekstradua nga autoritetet policore belge, pasi rezulton i dënuar me 10 vite burg.
Në vitin 2016, Gjykata e Rrethit Gjyqësor Tiranë e ka shpallur fajtor këtë person për mashtrim.
“Ky shtetas në bashkëpunim me të atin, në vitin 2008 kanë mashtruar një shtetas shqiptar dhe i kanë marrë shuma të konsiderueshme parash (rreth 30.000 $) duke i premtuar që do të mundësonin dërgimin e tij dhe të familjes së tij në Kanada”, sqaron policia.
Ndërkohë, nga Londra u ekstradua shtetasi me iniciale S.P. 40 vjeç, lindur në Fier.
Shtetasi S.P. ishte shpallur në kërkim ndërkombëtar, pasi Gjykata e Rrethit Gjyqësor Fier në Mars të vitit 2018, ka caktuar masën e sigurisë ”Arrest me burg” për veprat penale “Falsifikim monedhash”, “Falsifikim i dokumenteve” dhe “Falsifikim i letërnjoftimeve, ose vizave”.
Si rezultat i bashkëpunimit të Interpol Tirana me Interpol Manchester, u bë i mundur arrestimi dhe ekstradimit i tij.
