Vokzalnaya, një rrugë që shkon drejt stacionit hekurudhor në qendër të qytetit Buchas në Ukrainë, është kthyer në simbolin e zymtë të dhunës dhe brutalitetit të agresionit rus në Ukrainë.
Tre të katërtat e rrugës është e mbushur me skelete të djegur të tankeve ruse, të shpërthyera nga raketat ukrainase.
Çdo shtëpi në të dyja anët e rrugës është dëmtuar. Në pjesën përtej vendit ku ndodhet tanku i fundit gjenden fragmente eshtrash nga civilë të vrarë nga forcat ruse dhe që janë braktisur aty për javë me radhë.
“Ata u lanë të kalben pasi vdiqën, sikur të ishin thasë me mbeturina,” tha Dimitrou Zamohylny, një banor i Bucha.
“Tufa sorrash u ulën mbi trupat e civilëve, duke i çukitur dhe duke i ngrënë sytë. Nuk e kisha menduar kurrë se do të shihja diçka të tillë të ndodhte, në fakt po ndodhte pranë shtëpisë sime. Si mund të imagjinonte dikush diçka kaq të keqe, në një vend të zakonshëm si ky”- shtoi ai.
Por Bucha nuk është më thjesht “një vend i zakonshëm”. Ky qytet në veriperëndim të Kievit, me një popullsi prej 36,971 banorësh në regjistrimin e fundit, është tani në fokus ndërkombëtar për arsye të tmerrshme: masakra e qindra njerëzve gra, fëmijë dhe burra, ka bërë që të shtohen thirrjet që Putin të gjykohet për krime lufte.
Rusët janë tërhequr nga Bucha, siç kanë bërë nga një sërë qytetesh, ku kishin instaluar forcat e tyre ushtarake për të bërë të mundur pushtimin e Kievit dhe ndryshimin e pushtetit.
Presidenti i Ukrainës, i cili u ka mbijetuar përpjekjeve për ta rrëzuar, duke përfshirë dhe disa tentativa për ta eliminuar vizitoi qytetin e Bucha-s të hënën, i shoqëruar nga disa media, duke dëshmuar masakrën e ndodhur në qytet.
“Ne dimë për mijëra njerëz të vrarë dhe të torturuar, me gjymtyrë të prera, gra të përdhunuara dhe fëmijë të vrarë… njerëz të vdekur janë gjetur në fuçi, bodrume, të mbytur dhe të torturuar”, tha Volodymyr Zelensky.
