Ditën e djeshme qyteti i Matit është tronditur nga një ngjarje e rëndë ku mbetën të vdekur 3 punonjësit e Bashkisë dhe u plagos 1 tjetër teksa kishin shkuar për të ndërtuar rrugët e fshatit Shëlli.
54 vjeçari Kujtim Koxha, autori i krimit pas një debati me punonjësit e Bashkisë që kishin shkuar në fshat për të hapur një rrugë, ka marrë kallashin dhe në momentin kur ata kanë qenë duke drekuar i ka qëlluar me breshëri plumbash duke lënë të vdekur Mentor Hoxhën, Hamit Buçin dhe Erzen Aliajn, ndërkohë është plagosur Astrit Hani.
Në lokal në momentin e masakrës, ndodheshin 11 punonjësit e Bashkisë, kryeplaku Fatos Karrosi, si dhe disa banorë të fshatit. Duke folur për Top Channel, Karrosi i cili po ju shërbente drekën punëtorëve, pasi e kishte lokalin e të vëllait, ka parë Koxhën teksa qëllonte me kallash dhe ka nxituar ta ndalonte sepse mund të kishte ndodhur një tragjedi akoma më e rëndë dhe me më shumë viktima.
Kryeplaku Fatos Karrosi, ka treguar se në momentin që ai i ka kapur autorit qytën e automatikut me dorë dhe e ka ulur në tokë që të mos vriste persona të tjerë, ndërsa ai vazhdonte akoma të qëllonte dhe thoshte se do ti vriste të gjithë ata që ndodheshin brenda, madje në video duken vrimat që plumbat kanë bërë në dysheme.
