Gjyqtarët e seksionit të imigracionit të Gjykatës së Romës kanë pezulluar vendimin për konfirmimin e ndalimit të shtatë emigrantëve të transferuar në anijen Libra drejt Shqipërisë, duke e dërguar çështjen në Gjykatën e Drejtësisë të Bashkimit Evropian.
Duke qenë se nuk u dha, brenda 48 orëve të parashikuara me ligj, konfirmimi i ndalimeve të vendosura nga shefi i policisë së Romës, egjiptianët dhe bangladeshasit janë të lirë dhe, meqenëse nuk mund të qëndrojnë në Shqipëri sipas protokollit të nënshkruar nga Giorgia Meloni dhe Edi Rama, ata do të duhet të kthehen në Itali.
Për pesë prej tyre, komisionet territoriale përkatëse u kishin refuzuar përkohësisht të drejtën për azil sipas procedurave të përshpejtuara në kufi, duke e bërë të panevojshme mbajtjen e seancave mbi ndalimin, siç shpjegon Rosa Emanuele Lo Faro, avokate e specializuar në të drejtën e të huajve dhe politikat migratore. Ndërsa për dy migrantët e tjerë, historitë e të cilëve janë ende në shqyrtim dhe për të cilët komisionet territoriale nuk janë prononcuar ende, në dritën e vendimit të gjykatës së Romës, as ata nuk mund të mbahen më gjatë në Gjader.
Ajo që ndodhi më parë me grupin e parë prej dymbëdhjetë personash të shpëtuar në det nga rojet financiare dhe të mbyllur në qendrën e Gjaderit, po ndodh përsëri. Me disa risi: moszbatimi thelbësor i dekretit për “Vendet e Sigurta”, të miratuar me nxitim nga qeveria midis transferimit të parë dhe të dytë, për të shmangur një tjetër dështim dhe për të treguar një qëndrim më të ashpër ndaj gjyqtarëve; si dhe referimi paraprak në Gjykatën e Drejtësisë së Bashkimit Evropian, e cila më 4 tetor vendosi që, për qëllime ndalimi të një migranti, një vend mund të konsiderohet i sigurt vetëm nëse çdo pjesë e tij është e sigurt.
Nuk është një rast i izoluar: Gjykatës së BE-së i janë drejtuar kohët e fundit gjykatat e Bolonjës, Katanias dhe përsëri ajo e Romës. Sot erdhi vendimi i ri i gjyqtarëve të seksionit të imigracionit në kryeqytet. Një tjetër pengesë për projektin me Shqipërinë, që deri më tani i ka kushtuar shtetit mijëra euro, ndërkohë që qendrat e akomodimit janë bosh edhe pse funksionale prej një muaji.
Janë pezulluar gjithashtu 4 refuzime të azilit për migrantët e parë të sjellë në Shqipëri.
Dhe nuk është vetëm kaq. Migrantët e grupit të parë prej dymbëdhjetë personash, të transferuar në bordin e anijes Libra, e kishin apeluar refuzimin e kërkesave të tyre për mbrojtje ndërkombëtare. E njëjta seksion për imigracionin e Gjykatës Civile të Romës ka pezulluar të paktën katër prej këtyre refuzimeve për azil për po aq migrantë nga Bangladeshi dhe Egjipti, njëri prej tyre i përfaqësuar nga avokati Gennaro Santoro. Arsyeja e përmendur në vendimin e publikuar lidhet me vendimin që pritet të marrë Gjykata Evropiane e Drejtësisë, tek e cila gjykata e Romës është apeluar. Në dekretin që cakton një seancë të re për migrantët, shkruhet gjithashtu se “nuk është e disponueshme video-regjistrimi i seancës përpara komisionit territorial”. Një tjetër anomali në shpenzimet e larta për qendrat e ndalimit dhe kthimit në Gjader: për 22 sallat e seancave telematike janë shpenzuar mbi një milion euro, por video-regjistrimet nuk ekzistojnë./ La Repubblica
