Edicioni i katërt i Maratonës së Tiranës mbylli sot garën për kategorinë e fëmijëve.
Aktiviteti ‘’Fun Run’’ bashkoi të gjithë shkollat 9-vjeçare të kryeqytetit dhe zonave përreth duke shënuar një rekord të ri për pjesëmarrjen.
Gjatësia e garës ishte 2 km duke nisur nga sheshi ‘’Nënë Tereza’’, ndërsa finishi ishte sheshi ‘’Skënderbej’’. Ky edicion pati dhe fituesit e tij për kategorinë e djemve dhe vajzave. Edi Devole fitoi garën për djemtë, ndërsa Zhuljeta Çejku u shpall më e mira për vajzat.
Kryebashkiaku Erion Veliaj tërhoqi numrin me të cilin do të garojë nesër. Ai e konsideroi këtë garë si mënyrë e mirë për të promovuar kryeqytetin shqiptar.
‘’Dua shumë që Tirana të jetë nesër një kartolinë e një Shqipërie europiane, e një Shqipërie të pastër, me njerëz të sjellshëm, mikpritëse, e një Tirane që është e hapur për të gjithë turistët, duke qenë se do të kemi garues nga mbi 45 shtete të botës. Dua që të na ndihmoni duke shpërndarë ujin, të ndihmoni turistët e huaj për t’i treguar ku janë destinacionet në Tiranë, të ndihmoni dikë që do kalojë fundjavën në Tiranë, duke i dhënë ide sesi mund të shpenzojë sa më shumë kohë, por edhe të vizitojë sa më shumë gjëra”, u shpreh Veliaj në ceremoninë e ndarjes së çmimeve për fituesit e kategorisë ‘’Fun Run’’.