6 shqiptarë dhe një person me nënshtetësi ekuadoriane, banues në Barcelonë, kanë rënë në prangat e policisë spanjolle paraditen e sotme, pasi akuzohen për një sërë grabitjesh.
Banda kriminale e përbërë nga 10 persona, akuzohen se kanë kryer rreth 102 vjedhje me dhunë në provincën e Gironas.
Grupi i hajdutëve hynin në banesa dhe vidhnin para, bizhuteri dhe pajisje elektroshtëpiake.
Ata përdornin automjete të ndryshme për të kryer grabitjet dhe pajisje që çakordonin sinjalet e gjurmimit nga policia.
Ishin tre persona, anëtarë të grupit, të cilët kryenin grabitjet.
Njëri prej tyre bënte “rojen” dhe priste në makinë jashtë shtëpisë që ishte piketuar për të grabitur dhe nëse dallonte diçka të dyshimtë, alarmonte dy të tjerët të cilët kishin hyrë në shtëpi për të grabitur.
Aktiviteti i vjedhjeve ndodhte kryesisht gjatë orëve të pasdites dhe darkës kur niste të errësohej dhe në banesa nuk gjendej askush.
Hetimi ndaj bandës së hajdutëve nisi në vitin 2017 pasi u vu re një sërë grabitjesh nga i njëjti grup.
Gjykata vendosi arrest me burg për 3 prej tyre më 27 qershor të vitit të kaluar.