Kievi dhe Moska u përplasën këtë të martë për rrjedhat e tranzitit të gazit natyror në Evropë, në një grindje që mund të ndërpresë furnizimet me gaz përmes Ukrainës në kontintentin evropian.
Operatori i Sistemit të Transmetimit të Gazit të Ukrainës tha se flukset ruse përmes njërës prej dy pikave kyçe të hyrjes do të ndalen nga e mërkura.
Rusia ka vijuar normalisht transportin e gazit përmes Ukrainës, pavarësisht konfliktit, por së fundmi Kievi e kishte paralajmëruar Moskën se veprimet e trupave pushtuese në rajonin e Luhansk-ut mund të përfundojnë duke ndërprerë rreth një të tretën e gazit që ajo kalon në Evropë.
Rrjeti i gazit të Ukrainës tha se nuk mund të pranojë më tranzit të gazit rus nëpërmjet Sokhranivka nga ora 7 e mëngjesit me kohën lokale. Ai shtoi se flukset mund të ridrejtoheshin nëpërmjet Sudzha, një sugjerim që Gazprom e hodhi poshtë. Nëse të dy vendet nuk arrijnë në një marrëveshje, dërgesat e gazit në Evropë mund të fillojnë të bien nga e mërkura.
Sokhranivka dhe Sudzha janë dy pika kyçe në kufirin midis Rusisë dhe Ukrainës që marrin flukse nga Gazprom për tu tgransportuar më pas në Evropë. Që nga e marta, 27% e flukseve kaluan përmes Sokhranivka, me pjesën tjetër që kalonte përmes Sudzha.
Gazprom tha se nuk sheh asnjë problem që të vazhdojë të rrjedhë gaz përmes Ukrainës si zakonisht dhe se po përmbush të gjitha detyrimet ndaj klientëve evropianë.
