Një re tymi dhe flake tregon panoramën e fundit nga fronti i luftës në qytetin Severodonetsk, ku është duke u zhvilluar përplasja më e ashpër midis forcave ukrainase dhe atyre ruse.
Sipas mediave ndërkombëtare, qyteti është vendosur pothuajse nën kontrollin e plotë të Rusisë dhe situata nuk është aspak pozitive në kampin e Ukrainës, pasi kanë pësuar humbje të mëdha.
“Është keq, ka shumë të vdekur, rusët po bombardojnë fort dhe ne nuk kemi armë për t’u përgjigjur. Ne jemi shumë më mirë në fushë, por ata gjuajnë gjithnjë e më fort”, thonë ushtarët ukrainas të dekurajuar.
Në frontin kryesor të Donbasit dhe pikërisht në sektorin e nxehtë që shkon nga Izyum në Severodonetsk, rusët janë duke përparuar.
“Betejat gjithmonë ndodhin pak a shumë në të njëjtën mënyrë. Rusët fillojnë me bombardime e breshëri shumë intensive. Ata përdorin gjithçka që kanë në dispozicion të përqendruar në disa dhjetëra kilometra katrorë: nga artileria te mortajat, deri te aviacioni dhe dronët e armatosur”, tregojnë ata më tej.
Ndërkohë në krahun tjetër Rusia ka akuzuar shërbimet sekrete ukrainase se janë duke përgatitur një sulm me kimikate ndaj qytetit të Sumy-t dhe më pas do të fajësojnë Moskën për incidentin.
Këtë e ka pohuar koloneli Mikhail Mizintsev, fjalët e të cilit raportohen nga Ria Novosti, agjencia e shtypit rus.
“Forcat ukrainase do të lëshojnë predha artilerie në rajonet në kufi me Rusinë nga rajoni Sumy. Pas një kundërsulmi të dyshuar të organizuar nga forcat e armatosura ruse, oficerët e shërbimeve të sigurisë ukrainase planifikojnë të godasin me substanca të fuqishme helmuese në zonë”, mësohet të ketë thënë Mizintsev.
Sipas pretendimeve të Kolonelit rus, “incidenti do të regjistrohet nga ekspertë të Organizatës Kundër Përdorimit të Armëve Kimike dhe do të përdoret për të akuzuar forcat e armatosura ruse për përdorimin e armëve kimike kundër civilëve”.
