Presidenti rus, Vladimir Putin, u ka kërkuar oligarkëve të vendit të kontribuojnë financiarisht për të mbështetur buxhetin në vështirësi të mbrojtjes dhe vijimin e luftës në Ukrainë.
Sipas raportimeve të Financial Times, të paktën dy biznesmenë të mëdhenj i kanë shprehur gatishmërinë Putinit për të dhënë kontribute pas një takimi të zhvilluar së fundmi.
Kreu i Kremlinit pritet të vijojë ofensivën ushtarake, e nisur në shkurt 2022, deri në sigurimin e plotë të zonave të mbetura të rajonit lindor të Donbasit që nuk janë ende nën kontrollin rus.Raporti vjen në një moment kur negociatat e fundit, të ndërmjetësuara nga SHBA, nuk kanë sjellë përparim, pasi Ukraina ka refuzuar të tërhiqet nga Donbasi.
Zëdhënësi i Kremlinit, Dmitry Peskov, deklaroi se Rusia mbetet e hapur për bisedime paqeje me SHBA-në, por theksoi se çështjet kyçe – përfshirë territorin – mbeten të pazgjidhura.
Ndërkohë, presioni financiar mbi Moskën po rritet. Buxheti i mbrojtjes është rritur me 42%, duke arritur në 13.1 trilion rubla gjatë vitit të kaluar, ndërsa qeveria ka ndërmarrë masa për të stabilizuar ekonominë përmes taksave.
Ministri i Ekonomisë, Maxim Reshetnikov, paralajmëroi se Rusia mund të vendosë një tjetër taksë të jashtëzakonshme për kompanitë e mëdha nëse rubla vazhdon të dobësohet.
Në të njëjtën kohë, TVSH-ja është rritur në 22% për të siguruar të ardhura shtesë, ndërsa deficiti buxhetor në dy muajt e parë të vitit ka arritur mbi 90% të planifikimit vjetor, i ndikuar edhe nga sanksionet amerikane që kanë detyruar Rusinë të shesë naftën me çmime të ulura.
Edhe vetë Putin ka bërë thirrje për kujdes në menaxhimin e të ardhurave shtesë nga rritja e çmimeve të energjisë, duke paralajmëruar kundër shpenzimeve të pakontrolluara.
Nga ana tjetër, presidenti ukrainas, Volodymyr Zelenskyy, deklaroi se SHBA po e kushtëzon një marrëveshje sigurie me dorëzimin e plotë të Donbasit nga Ukraina – një kërkesë që Kievi e kundërshton.
