Në Shtetet e Bashkuara të Amerikës janë disa medikamentet me të cilat pro luftohet koronavirusi. Në një intervistë përmes Skype-it me studion e lajmeve në TemA TV, mjeku Ervin Mazniku tha se pavarësisht se FDA nuk ka miratuar ende një terapi, në spitale të infektuarit po trajtohen me disa medikamente.
“Nuk ka medikament apo terapi të aprovuar nga FDA-ja (Administrata e Ushqimit dhe Ilaçeve). Por medikamentet që përdoren si aksesorë është Remdisivir, Hidroksiklorokina dhe Azitromicina.
Por edhe përdorimi i plazmës. Një studim që është bërë në Francë nxori se pas përdorimit të hidroksiklorokinës pacientët kanë pasur përmirësim. Përdorim po merr edhe plazma. Ajo jep rezultate pozitive. Ato janë antitrupa që janë të përfshirë në gjak”, tha ai.
Lidhur me hipotezën e rasteve të koronavirusit shumë përpara se të zyrtarizoheshin rastet e para, Mazniku tha se nuk ka ende një përgjigje shkencore.
“Nuk mund të shprehem sepse nuk kam info. Nuk besoj se është i plotë aspekti sa i përket të dhënave akademike. Në media spekulohet shumë me këtë pjesë. Është ende shpejt për të dhëna të tilla”, tha ai.
Mjeku Mazniku tha se karantinimi i ka dhënë efektet e veta pozitive.
“Është një udhëzim që u është dhënë qytetarëve të reduktojnë në mënyrë maksimale daljen nga shtëpia. Ka dhënë rezultat pozitiv”, përfundoi ai.
