Telashet për Partinë Demokratike filluan të gjitha nëntorin e kaluar, kur firma lobuese amerikane “Muzin Capitol Partners” plotësoi me informacione shtesë deklarimet e saj të detyruara me ligj për Departamentin e Drejtësisë.
Sipas deklarimeve të kompanisë “Muzin” ajo ka marrë tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017: Pagesa e parë mban datën 24 mars 2017 dhe është bërë nga firma “Biniatta Trade LP”, me një vlerë prej 150 mijë dollarësh, dy pagesat e tjera janë bërë nga Partia Demokratike, njëra më 27 mars, për 25 mijë dollarë, dhe tjetra më 9 qershor për 500 mijë dollarë.
Nga këto deklarime të firmës Muzin, vetëm ajo prej 25 mijë dollarësh, është pranuar nga kryetari i PD-së, Lulzim Basha që është paguar nga PD-ja. Dy të tjerat janë të paqarta.
Kreu i demokratëve ndonëse muaj më parë deklaroi se nuk do të paraqitej në Prokurori duket se ka ndryshuar mendjen teksa mëngjesin e kësaj të hëne I është përgjigjur thirrjes të Prokurorisë që sipas PD këtë radhë “e kishte formuluar ndryshe kërkesën e paraqitjes”(?!)
Më 8 mars “Zëri I Amerikës” në një artikull theksoi disa momente sipas të cilës deklaratat e PD mbeteshin të paqarta dhe nuk përputheshin.
Tre momente “kyçe” të shkrimit:
- “Megjithatë mbetet i paqartë angazhimi i “Biniatta Trade LP” në favor të Partisë Demokratike, duke paguar 150 mijë dollarë. “Muzin Capitol Partners” deklaron se është “kompensuar nga “Biniatta Trade LP” për aktivitetet e organizuara në emër të Partisë Demokratike për të promovuar lidershipin konservator shqiptar pranë biznesve dhe udhëheqësve politikë në Shtetet e Bashkuara”.
- Mbetet ende e paqartë kjo mospërputhje faktesh, ku “Muzin Capitol Partners”, deklaron se është paguar nga PD-ja, ndërsa zoti Basha deklaron se pagesa është bërë nga shqiptaro-amerikanët.
- Si përmbledhje, PD ka deklaruar në KQZ 100 mijë dollarë për firmën “Barnes&Thornburg”, zoti Basha ka pranuar edhe 25 mijë dollarë pagesë për firmën Muzin, ndërkohë që mungojnë nga deklarimet në KQZ 150 mijë të bëra për PD-në nga Biniatta dhe 500 mijë, që Muzin thotë i ka bërë PD, ndërsa PD pretendon se i ka paguar komuniteti shqiptaro-amerikan.”
Më herët sot, sekretari i përgjithshëm i PS Taulant Balla dhe ministrja e Parlamentit Elisa Spiropali i bën thirrje Lulzim Bashës të tregonte njëherë e mirë të vertetën e lobimit që sipas tyre nuk mund të fshihet më.
Nga ana tjetër Prokuroria deklaroi se “Nga hetimi kanë rezultuar dyshime të arsyeshme të bazuara në prova se ka një diferencë thelbësore mes deklarimeve të bëra zyrtare për shpenzimet e bëra nga subjekti PD, dhe shpenzimeve reale që ky subjekt ka bërë”.
Përgatiti: AlpeNews.al