“Kërkesat e studentëve janë të arsyeshme por meritojnë diskutim pik për pikë, sepse çështja është si do zbatohet secila prej tyre dhe sa kohë duhet për secilën prej tyre”.
Kështu deklaroi Kryeministri Rama në Top Channel, ku theksoi se mbi studentët ka patur presion nga palët politike të përfshira në protestë, PD dhe LSI, që ata të mos përfshihen në dialog.
“Ka patur presion nga frika se nëse studentët do futen në dialog, partitë e maskuara në protestë, do ngeleshin në hallin e vet”, tha Rama.
Kryeministri Rama tha se tashmë kanë dalë në pah katër komponentët e kësaj proteste.
“Janë tre komponentë të strukturuar me një axhendë të tyrën dhe ka të katërtin që ka krijuar masë, komponenti i studentëve që kanë hallin e tyre dhe nuk janë pjesë e axhendave të këtyre tre komponentëve. Dy dihen, PD dhe LSI, pra opozita që ka premtuar prej kohësh një revolucion dhe që ka premtuar se do ta cojnë këtë punë deri në rrëzimin e qeverisë me dhunë. I treti është lëvizja për universitetin që nuk ka asnjë lidhje me programin tonë”, tha Rama.
Problemi sipas tij, është në rastet kur qeveria nuk të dëgjon. “Por kur qeveria të dëgjon, nuk ka asnjë arsye pse studentët duhet t’i thonë jo dialogut”, tha kreu i qeverisë.
