Fëmija i parë i vitit 2018 ka qenë djalë dhe ka lindur në Tiranë, rreth orës 00:00 e 10 sekonda.
Lael është djali që ka ardhur në jetë vetëm pak sekonda pas hyrjes së vitit 2018.
Një video e ardhur në redaksinë e Ora News, tregon momentin kur fëmija vjen në jetë me operacion. Fëmija gëzon shëndet të plotë dhe peshon plot 4 kg e 100 gram. Bebja ka ardhur në jetë në maternitetin “Koço Gliozheni” në Tiranë dhe eshte djali i gazetares Silvana Muca.
Ajo e ka ndare vete lajmin ne rrjetet sociale ku shkruan:
“Dhuratë më të bukur nuk mund të merrja për këtë Vit të Ri 2018. Faleminderit që erdhe mes nesh Lael!”
Sakaq, Ministrja e Shëndetësisë dhe Mbrojtjes Sociale Ogerta Manastirliu vizitoi në mëngjes dy bebet e para të vitit në dy maternitetet e Tiranës ku dhuroi pako të posaçme për të porsalindurit dhe uroi vitin e ri 2018 të sapoardhurve në jetë, familjeve të tyre dhe të gjithë shqiptarëve.
“Një djalë, Laeli, në Maternitetin Koço Gliozheni dhe një vajzë, Nadia në Maternitetin Mbretëresha Geraldinë janë dy fëmijët e parë të vitit, dy fëmijë të shëndetshëm, një ogur i mirë për këtë vit të ri që uroj të jetë i mbarë dhe i begatë për të gjithë shqiptarët”, tha Ministrja Manastirliu.
9 fëmijë kanë lindur në ditën e parë të vitit në Maternitetin Mbretëresha Gerladinë dhe 7 fëmijë erdhën në jetë në Maternitetin Koço Gliozheni.
Sipas Ministres së Shëndetësisë dhe Mbrojtjes Sociale, viti 2018 do të jetë viti i fëmijëve.
“Për ne fëmijët janë të parët ndaj viti 2018 do të jetë viti i fëmijëve me nisma shumë të rëndësishme të Ministrisë sonë sa i takon mirëushqyerjes dhe shëndetit të fëmijëve”, tha Manastirliu./panorama
