Zëvendëskryeminsitri i Kosovës, Fatmir Limaj, po merr pjesë në konferencën e organizuar nga Partitë Socialdemokrate Evropiane në Podgoricë me temën “Hyrja në BE e Ballkanit Perëndimor përgjegjësi e përbashkët e jona”.
“Të gjithë diskutuesit u pajtuan që Integrimi në Bashkimin Evropian i vendeve të Ballkanit Perëndimor është përgjegjësi e përbashkët e jona, por edhe obligim ndaj qytetarëve të vendeve tona dhe se orientimi i vendeve të Ballkanit Perëndimor drejt BE-së është i paalternativë”, ka shkruar Limaj në Facebook, njofton Klan Kosova.
Zëvendëskryeminsitri kosovar ka thënë se “socialdemokratët anekënd Evropës edhe njëherë theksuan gatishmërinë që t’i mbështesin partitë simotra në Ballkan për të ndihmuar në implementimin e programeve socialdemokrate, bartjen e përvojave e cila do të përshpejtonte rrugën drejt BE-së”.
“Ne, Nisma Socialdemokrate jemi krenarë që i takojmë vizionit dhe frymës socialdemokrate evropiane dhe do të punojmë me të gjitha partitë simotra në Evropë për t’i sjellë përvojat e tyre më të mira edhe në Kosovë”.
Kjo konferencë do t’i vazhdojë nesër punimet në Tiranë.