Jorida Murati, 32- vjeçarja që u arrestua dy ditë më parë nga Policia, e dyshuar si pjesë e grupit “Bajri”, paguhej fiktivisht në Spitalin e Shkodrës, ku ishte punësuar me “porosi” të mikut të saj, Behar Bajrit.
Punësimi i saj ishte një ndër porositë, që ai ia la të shënuara në një letër gjatë një takimi afro 3-orësh që Murati zhvilloi me Bajrin, kur ai mbahej në paraburgim në Holandë para se të ekstradohej. Ishte pikërisht ky takim në burg, që solli zhvillime në hetimet ndaj grupit “Bajri”, për të cilët tashmë është shtuar edhe një akuzë, madje janë dhënë edhe 10 masa të tjera sigurie.
Në njoftimin zyrtar, Policia tha se 32-vjeçarja Murati është arrestuar, pasi dyshohet për veprën penale “Vjedhje duke shpërdoruar detyrën”, kryer në kuadër të grupit të strukturuar kriminal. Gjykata i ka caktuar masën e sigurisë “Arrest në burg” dhe gjatë operacionit të së enjtes për ekzekutimin e masave të sigurisë, Policia ka ushtruar kontroll në banesën e saj ku ka gjetur një shumë prej 9 mijë eurosh.
HETIMI
Sipas burimeve nga Policia, hetimet për përfshirjen e “infermieres” në grupin “Bajri” nisën pas një takimi mes saj dhe Behar Bajrit, në Holandë, kur ai mbahej në paraburgim derisa u ekstradua në Shqipëri në fund të muajit korrik.
Të njëjtat burime thanë se pas informacioneve të marra nga autoritetet holandeze, Policia shqiptare ka mësuar se 32- vjeçarja Jorida Murati është takuar me Behar Bajrin në burg në një vizitë si e afërme e tij. Mes tyre ka pasur një takim që ka zgjatur afro 3 orë dhe nga përgjimi janë zbuluar të dhëna për hetimet. Dyshohet se Bajri i ka dhënë një letër me porosi, të cilat më pas Murati i ka zbatuar kur është kthyer në Shqipëri.
Sipas Policisë, drejtuesi i grupit, Behar Bajri, ushtronte ndikim të paligjshëm në Spitalin Rajonal Shkodër, me qëllim që shtetasja Jorida Murati, të punësohej formalisht si infermiere në këtë spital dhe në të njëjtën kohë përfitonte nga kreditimi i pagës. Nga hetimet e kryera, dyshohet se këta shtetas dhe 8 të tjerë, në bashkëpunimin dhe me njëri-tjetrin, kanë përfituar shuma parash nëpërmjet kanosjes dhe shtrëngimit ndaj dy shtetasve.
AKUZAT E REJA
Policia e Shtetit tha të enjten se në vazhdim të operacionit të koduar “Oaz”, i cili u finalizua në shtator të vitit të kaluar, janë dokumentuar vepra të tjera penale në ngarkim të grupit të strukturuar kriminal “Bajri”. Gjykata ka dhënë 10 masa të reja sigurie në ngarkim të pjesëtarëve të grupit kriminal, për 9 prej tyre janë ekzekutuar masat, ndërsa një shtetas është shpallur në kërkim.
“Në vijim të operacionit ‘OAZ’, gjatë hetimeve të kryera nga Departamenti i Policisë Kriminale, në bashkëpunim me Policinë e Shkodrës, në koordinim me Prokurorinë e Krimeve të Rënda, në ngarkim të grupit kriminal ‘Bajri’, u arrit të dokumentoheshin edhe vepra të tjera penale, të kryera nga pjesëtarët e këtij grupi. Si rezultat i hetimeve dhe provave të grumbulluara nga Policia, Gjykata e Shkallës së Parë për Krimet e Rënda Tiranë ka caktuar 10 masa të reja sigurie në kuadër të anëtarëve dhe lidhjeve të grupit kriminal ‘Bajri’”, tha Policia.
ME MASË “ARREST NË BURG”
- Behar Brajoviq (Bajri)
- Safet Rustemi (Bajri)
- Ilir Rustemi (Bajri)
- Asmer Bilali
ME MASË “ARREST NË SHTËPI”
- Senad Halluni, shef shërbimesh te materniteti pranë Spitalit Rajonal Shkodër
- Florine Hoxha, kryeinfermiere pranë repartit obstetrik te materniteti pranë Spitalit Rajonal Shkodër
- Mira Nikaj, përgjegjëse finance në Spitalin Rajonal Shkodër
